ghubar-e-jaan pas-e-diwar-o-dar sameTa hai

ġhubār-e-jāñ pas-e-dīvār-o-dar sameTā hai

dayār-e-sañg meñ shīshe kā ghar sameTā hai

samundaroñ meñ bhī sūraj ne bo diye haiñ sarāb

ga.e the siip uThāne bhañvar sameTā hai

sa.ūbatoñ kī koī had na āḳhirī dekhī

har ek raah meñ zād-e-safar sameTā hai

mohabbatoñ ne diyā hai sadāqatoñ kā shu.ūr

bikhar gayā hai jab ik baar ghar sameTā hai

havā ke saath safar meñ qabāhateñ thiiñ bahut

misāl-e-abr bikhartā nagar sameTā hai

añdherī raat meñ sūraj kī justujū kī hai

havāoñ meñ bhī charāġh-e-nazar sameTā hai

jo shāḳh shāḳh parindoñ kā āshiyāna thā

vo barg barg purānā shajar sameTā hai

numū ke rab kabhī us munsifī kī daad to de

shajar koī na lagāyā samar sameTā hai

ghubar-e-jaan pas-e-diwar-o-dar sameTa hai

dayar-e-sang mein shishe ka ghar sameTa hai

samundaron mein bhi suraj ne bo diye hain sarab

gae the sip uThane bhanwar sameTa hai

saubaton ki koi had na aaKHiri dekhi

har ek rah mein zad-e-safar sameTa hai

mohabbaton ne diya hai sadaqaton ka shuur

bikhar gaya hai jab ek bar ghar sameTa hai

hawa ke sath safar mein qabahaten thin bahut

misal-e-abr bikharta nagar sameTa hai

andheri raat mein suraj ki justuju ki hai

hawaon mein bhi charagh-e-nazar sameTa hai

jo shaKH shaKH parindon ka aashiyana tha

wo barg barg purana shajar sameTa hai

numu ke rab kabhi us munsifi ki dad to de

shajar koi na lagaya samar sameTa hai