gudaz-e-dil se baatin ka tajalli-zar ho jaana

gudāz-e-dil se bātin kā tajallī-zār ho jaanā

mohabbat asl meñ hai ruuh kā bedār ho jaanā

naved-e-aish se ai dil zarā hushyār ho jaanā

kisī taaza musībat ke liye tayyār ho jaanā

vo un ke dil meñ shauq-e-ḳhud-numā.ī kā ḳhayāl aanā

vo har shai kā tabassum ke liye tayyār ho jaanā

mizāj-e-husn ko ab bhī na samjho to qayāmat hai

hamārā aur vafā ke naam se be-zār ho jaanā

sahar kā is tarah añgḌā.ī lenā dil-farebī se

udhar shā.ir ke mahsūsāt kā bedār ho jaanā

tavassul se tire dil meñ bharūñgā quvvateñ barqī

zarā merī taraf bhī ai nigāh-e-yār ho jaanā

vo ārā.ish meñ sab quvvat kisī kā sarf kar denā

tahammul meñ vo har koshish mirī bekār ho jaanā

ma.āz-allāh ab ye rañg hai duniyā kī mahfil kā

ḳhudā kā naam lenā aur zalīl o ḳhvār ho jaanā

ragoñ se ḳhuun saarā zahr ban kar phuuT niklegā

zarā ai 'josh' zabt-e-shauq se hushyār ho jaanā

gudaz-e-dil se baatin ka tajalli-zar ho jaana

mohabbat asl mein hai ruh ka bedar ho jaana

nawed-e-aish se ai dil zara hushyar ho jaana

kisi taza musibat ke liye tayyar ho jaana

wo un ke dil mein shauq-e-KHud-numai ka KHayal aana

wo har shai ka tabassum ke liye tayyar ho jaana

mizaj-e-husn ko ab bhi na samjho to qayamat hai

hamara aur wafa ke nam se be-zar ho jaana

sahar ka is tarah angDai lena dil-farebi se

udhar shair ke mahsusat ka bedar ho jaana

tawassul se tere dil mein bharunga quwwaten barqi

zara meri taraf bhi ai nigah-e-yar ho jaana

wo aaraish mein sab quwwat kisi ka sarf kar dena

tahammul mein wo har koshish meri bekar ho jaana

maaz-allah ab ye rang hai duniya ki mahfil ka

KHuda ka nam lena aur zalil o KHwar ho jaana

ragon se KHun sara zahr ban kar phuT niklega

zara ai 'josh' zabt-e-shauq se hushyar ho jaana