guftugu jab muhaal ki hogi

guftugū jab muhāl kī hogī

baat us kī misāl kī hogī

zindagī hai ḳhayāl kī ik baat

jo kisī be-ḳhayāl kī hogī

thī jo ḳhushbū sabā kī chādar meñ

vo tumhārī hī shaal kī hogī

na samajh pā.eñge vo ahl-e-firāq

jo aziyyat visāl kī hogī

dil pe taarī hai ik kamāl-e-ḳhushī

shāyad apne zavāl kī hogī

jo atā ho visāl-e-jānāñ kī

vo udāsī kamāl kī hogī

aaj kahnā hai dil ko haal apnā

aaj to sab ke haal kī hogī

ho chukā maiñ so fikr yāroñ ko

ab mirī dekh-bhāl kī hogī

ab ḳhalish kyā firāq kī us ke

ik ḳhalish māh-o-sāl kī hogī

kufr-o-īmāñ kahā gayā jis ko

baat vo ḳhadd-o-ḳhāl kī hogī

'jaun' dil ke ḳhutan meñ aayā hai

har ġhazal ik ġhazāl kī hogī

kab bhalā aa.egī javāb ko raas

jo bhī hālat savāl kī hogī

guftugu jab muhaal ki hogi

baat us ki misal ki hogi

zindagi hai KHayal ki ek baat

jo kisi be-KHayal ki hogi

thi jo KHushbu saba ki chadar mein

wo tumhaari hi shaal ki hogi

na samajh paenge wo ahl-e-firaq

jo aziyyat visal ki hogi

dil pe tari hai ek kamal-e-KHushi

shayad apne zawal ki hogi

jo ata ho visal-e-jaanan ki

wo udasi kamal ki hogi

aaj kahna hai dil ko haal apna

aaj to sab ke haal ki hogi

ho chuka main so fikr yaron ko

ab meri dekh-bhaal ki hogi

ab KHalish kya firaq ki us ke

ek KHalish mah-o-sal ki hogi

kufr-o-iman kaha gaya jis ko

baat wo KHadd-o-KHal ki hogi

'jaun' dil ke KHutan mein aaya hai

har ghazal ek ghazal ki hogi

kab bhala aaegi jawab ko ras

jo bhi haalat sawal ki hogi