gul ko bu bulbul ko naghma chahiye

gul ko bū bulbul ko naġhma chāhiye

ai dil-e-muztar tujhe kyā chāhiye

nīm-shab meñ ho tulū'-e-āftāb

ai ġham-e-dil aisā naġhma chāhiye

ye sitāre qatra-e-shabnam baneñ

soz-e-dil pur-dard naala chāhiye

tū bahut achchhā hai lekin ai nigār

dil ko kuchh tujh se bhī achchhā chāhiye

merī hastī ko 'ināyat kī nazar

ḳhirman-e-dahqāñ ko sho'la chāhiye

ramz-e-ulfat hai yahī ahl-e-vafā

aa.ina dil kā shikasta chāhiye

gesū-e-jānāñ agar suljhā to kyā

gesū-e-getī sañvarnā chāhiye

zindagī-e-ḳhizr kī hājat nahīñ

sarḳhushī kā ek lamha chāhiye

dil kī ḳhvāhish hājat-e-darvesh hai

tere dar se kuchh to milnā chāhiye

maiñ nasīm-e-sub.h huuñ mujh se hijāb

ai urūs-e-lāla aisā chāhiye

'tāj' hai banda tirā husn-e-azal

kyā bhalā is se bhī parda chāhiye

gul ko bu bulbul ko naghma chahiye

ai dil-e-muztar tujhe kya chahiye

nim-shab mein ho tulu'-e-aftab

ai gham-e-dil aisa naghma chahiye

ye sitare qatra-e-shabnam banen

soz-e-dil pur-dard nala chahiye

tu bahut achchha hai lekin ai nigar

dil ko kuchh tujh se bhi achchha chahiye

meri hasti ko 'inayat ki nazar

KHirman-e-dahqan ko sho'la chahiye

ramz-e-ulfat hai yahi ahl-e-wafa

aaina dil ka shikasta chahiye

gesu-e-jaanan agar suljha to kya

gesu-e-geti sanwarna chahiye

zindagi-e-KHizr ki hajat nahin

sarKHushi ka ek lamha chahiye

dil ki KHwahish hajat-e-darwesh hai

tere dar se kuchh to milna chahiye

main nasim-e-subh hun mujh se hijab

ai urus-e-lala aisa chahiye

'taj' hai banda tera husn-e-azal

kya bhala is se bhi parda chahiye