gul-o-saman ki tarah dil mein hans rahe hain hum

gul-o-saman kī tarah dil meñ hañs rahe haiñ ham

ye aur baat ba-zāhir bujhe bujhe haiñ ham

koī bhī vāhima gumrāh kar nahīñ saktā

tire ḳhayāl kī zanjīr meñ bañdhe haiñ ham

kabhī to uljhā kiye kaise kaise logoñ se

kabhī to aise huā ḳhud se laḌ paḌe haiñ ham

nigār-ḳhāne meñ tasvīr-e-ḳhastā-tar kī tarah

kisī ke sāmne kab se saje hue haiñ ham

kiye haiñ auroñ pe tanqīd-o-tabsare lekin

ḳhud apnā jā.eza ab tak na le sake haiñ ham

hamesha aap ko samjhā ki aap apne haiñ

hamesha aap ne samjhā ki dūsre haiñ ham

'kamāl' ham se ḳhushāmad kisī kī ho na sakī

is e'tibār se mash.hūr sar-phire haiñ ham

gul-o-saman ki tarah dil mein hans rahe hain hum

ye aur baat ba-zahir bujhe bujhe hain hum

koi bhi wahima gumrah kar nahin sakta

tere KHayal ki zanjir mein bandhe hain hum

kabhi to uljha kiye kaise kaise logon se

kabhi to aise hua KHud se laD paDe hain hum

nigar-KHane mein taswir-e-KHasta-tar ki tarah

kisi ke samne kab se saje hue hain hum

kiye hain auron pe tanqid-o-tabsare lekin

KHud apna jaeza ab tak na le sake hain hum

hamesha aap ko samjha ki aap apne hain

hamesha aap ne samjha ki dusre hain hum

'kamal' hum se KHushamad kisi ki ho na saki

is e'tibar se mashhur sar-phire hain hum