gulon ko chhu ke shamim-e-dua nahin aai

guloñ ko chhū ke shamīm-e-duā nahīñ aa.ī

khulā huā thā darīcha sabā nahīñ aa.ī

havā-e-dasht abhī to junūñ kā mausam thā

kahāñ the ham tirī āvāz-e-pā nahīñ aa.ī

abhī sahīfa-e-jāñ par raqam bhī kyā hogā

abhī to yaad bhī be-sāḳhta nahīñ aa.ī

ham itnī duur kahāñ the ki phir palaT na sakeñ

savād-e-shahr se koī sadā nahīñ aa.ī

sunā hai dil bhī nagar thā rasā basā bhī thā

jalā to aañch bhī ahl-e-vafā nahīñ aa.ī

na jaane qāfile guzre ki hai qayām abhī

abhī charāġh bujhāne havā nahīñ aa.ī

bas ek baar manāyā thā jashn-e-mahrūmī

phir is ke ba.ad koī ibtilā nahīñ aa.ī

hatheliyoñ ke gulāboñ se ḳhuun ristā rahā

magar vo shoḳhī-e-rañg-e-hinā nahīñ aa.ī

ġhayūr dil se na māñgī ga.ī murād 'adā'

barasne aap hī kaalī ghaTā nahīñ aa.ī

gulon ko chhu ke shamim-e-dua nahin aai

khula hua tha daricha saba nahin aai

hawa-e-dasht abhi to junun ka mausam tha

kahan the hum teri aawaz-e-pa nahin aai

abhi sahifa-e-jaan par raqam bhi kya hoga

abhi to yaad bhi be-saKHta nahin aai

hum itni dur kahan the ki phir palaT na saken

sawad-e-shahr se koi sada nahin aai

suna hai dil bhi nagar tha rasa basa bhi tha

jala to aanch bhi ahl-e-wafa nahin aai

na jaane qafile guzre ki hai qayam abhi

abhi charagh bujhane hawa nahin aai

bas ek bar manaya tha jashn-e-mahrumi

phir is ke baad koi ibtila nahin aai

hatheliyon ke gulabon se KHun rista raha

magar wo shoKHi-e-rang-e-hina nahin aai

ghayur dil se na mangi gai murad 'ada'

barasne aap hi kali ghaTa nahin aai