gulon ko sahn-e-chaman mein qarar kya hoga

guloñ ko sahn-e-chaman meñ qarār kyā hogā

ḳhizāñ ke daur meñ shukr-e-bahār kyā hogā

ye shab umīd-e-sahar meñ guzār dī lekin

sahar se tā-ba-shab intizār kyā hogā

havā-e-dasht jo dīvāna-vār guzrī hai

na jaane aaj lab-e-jūebār kyā hogā

jise alam bhī mohabbat meñ raas aa na sakā

kisī ḳhushī kā use e’tibār kyā hogā

bajā nasīhat-e-tark-e-sharāb bhī nāseh

ilāj-e-āmad-e-abr-e-bahār kyā hogā

shikār-e-kākul-o-ruḳh ho chukā dil-e-'maikash'

shikār-e-gardish-e-lail-o-nahār kyā hogā

gulon ko sahn-e-chaman mein qarar kya hoga

KHizan ke daur mein shukr-e-bahaar kya hoga

ye shab umid-e-sahar mein guzar di lekin

sahar se ta-ba-shab intizar kya hoga

hawa-e-dasht jo diwana-war guzri hai

na jaane aaj lab-e-juebar kya hoga

jise alam bhi mohabbat mein ras aa na saka

kisi KHushi ka use e’tibar kya hoga

baja nasihat-e-tark-e-sharab bhi naseh

ilaj-e-amad-e-abr-e-bahaar kya hoga

shikar-e-kakul-o-ruKH ho chuka dil-e-'maikash'

shikar-e-gardish-e-lail-o-nahaar kya hoga