gulon mein rang bharega mujhe ye fikr nahin

guloñ meñ rang bharegā mujhe ye fikr nahīñ

chīnār phir se jalegā mujhe ye fikr nahīñ

vo uuñT sūñgh ke mahmil-nashīnoñ kī ḳhushbū

uThegā yā na uThegā mujhe ye fikr nahīñ

vo mere aage koī morcha sambhālegā

ki mere pīchhe chhupegā mujhe ye fikr nahīñ

havā.eñ sang ko tālīm-e-habas--e-dam deñ yā

shajar vazīfa paḌhegā mujhe ye fikr nahīñ

maiñ DevḌhī pe to laTkā ke aa gayā ghanTāl

bajegā yā na bajegā mujhe ye fikr nahīñ

havā-e-tāza mujhe chāhiye darīcha khol

charāġh kis kā bujhegā mujhe ye fikr nahīñ

maiñ apne said ko kachchā chabā gayā ab alaav

jalegā yā na jalegā mujhe ye fikr nahīñ

gulon mein rang bharega mujhe ye fikr nahin

chinar phir se jalega mujhe ye fikr nahin

wo unT sungh ke mahmil-nashinon ki KHushbu

uThega ya na uThega mujhe ye fikr nahin

wo mere aage koi morcha sambhaalega

ki mere pichhe chhupega mujhe ye fikr nahin

hawaen sang ko talim-e-habas--e-dam den ya

shajar wazifa paDhega mujhe ye fikr nahin

main DewDhi pe to laTka ke aa gaya ghanTal

bajega ya na bajega mujhe ye fikr nahin

hawa-e-taza mujhe chahiye daricha khol

charagh kis ka bujhega mujhe ye fikr nahin

main apne said ko kachcha chaba gaya ab alaw

jalega ya na jalega mujhe ye fikr nahin