gulshan ho nigahon mein to jannat na samajhna

gulshan ho nigāhoñ meñ to jannat na samajhnā

dam-bhar kī ināyat ko mohabbat na samajhnā

kyā shai hai matā-e-ġham-o-rāhat na samajhnā

jiinā hai to jiine kī haqīqat na samajhnā

ho ḳhair tire ġham kī ki ham ne tire ġham se

sīkhā hai masarrat ko masarrat na samajhnā

nisbat hī nahīñ koī mohabbat ko ḳhirad se

ai dil kabhī mafhūm-e-mohabbat na samajhnā

ye kis ne kahā tum se ki rūdād-e-vafā ko

sun kar bhī samajhne kī zarūrat na samajhnā

vīrānī-e-māhaul ko barbādī-e-dil ko

har daur meñ āsār-e-mohabbat na samajhnā

sar ḳham ho agar maslahat-e-vaqt ke aage

is jabr-e-musalsal ko ibādat na samajhnā

dekhe jo tumheñ koī mohabbat kī nazar se

lillāh 'shakīl' us ko mohabbat na samajhnā

gulshan ho nigahon mein to jannat na samajhna

dam-bhar ki inayat ko mohabbat na samajhna

kya shai hai mata-e-gham-o-rahat na samajhna

jina hai to jine ki haqiqat na samajhna

ho KHair tere gham ki ki hum ne tere gham se

sikha hai masarrat ko masarrat na samajhna

nisbat hi nahin koi mohabbat ko KHirad se

ai dil kabhi mafhum-e-mohabbat na samajhna

ye kis ne kaha tum se ki rudad-e-wafa ko

sun kar bhi samajhne ki zarurat na samajhna

virani-e-mahaul ko barbaadi-e-dil ko

har daur mein aasar-e-mohabbat na samajhna

sar KHam ho agar maslahat-e-waqt ke aage

is jabr-e-musalsal ko ibaadat na samajhna

dekhe jo tumhein koi mohabbat ki nazar se

lillah 'shakil' us ko mohabbat na samajhna