gulshan mein tere husn ki jab baat chali hai

gulshan meñ tire husn kī jab baat chalī hai

Thahrī hai nazar gul pe na ġhunche pe rukī hai

rakhtī hai jigar garche vo nāzuk sī kalī hai

tūfānoñ se khelī hai vo kāñToñ meñ palī hai

jo lab pe na aa paa.ī vo āñkhoñ ne kahī hai

āñkheñ bhī na kah pā.īñ jo vo dil ne sunī hai

aa kar tire dar par mujhe ehsās huā ye

bhaTkī huī kashtī mirī sāhil se lagī hai

kitne hī chaman ujḌe hue ḳhaak nasheman

kyā vaqt kī āñkhoñ meñ kabhī aa.ī namī hai

ek buuñd ko tarsā koī hai pī ke koī mast

maiḳhāne kā saaqī abhī andāz vahī hai

dekhā hai 'habīb' us ne jo ek baar karam se

har shai mujhe ab pyaar se hī dekh rahī hai

gulshan mein tere husn ki jab baat chali hai

Thahri hai nazar gul pe na ghunche pe ruki hai

rakhti hai jigar garche wo nazuk si kali hai

tufanon se kheli hai wo kanTon mein pali hai

jo lab pe na aa pai wo aankhon ne kahi hai

aankhen bhi na kah pain jo wo dil ne suni hai

aa kar tere dar par mujhe ehsas hua ye

bhaTki hui kashti meri sahil se lagi hai

kitne hi chaman ujDe hue KHak nasheman

kya waqt ki aankhon mein kabhi aai nami hai

ek bund ko tarsa koi hai pi ke koi mast

maiKHane ka saqi abhi andaz wahi hai

dekha hai 'habib' us ne jo ek bar karam se

har shai mujhe ab pyar se hi dekh rahi hai