gulzar mein jo dur gul-e-lala-rang ho

gulzār meñ jo duur gul-e-lāla-rañg ho

vo be-hijābiyāñ hoñ ki nargis bhī dañg ho

sayyād o bāġhbāñ meñ bahut hotī hai salāh

aisā na ho kahīñ gul o bulbul meñ jañg ho

afsos maut bhī nahīñ aatī shab-e-firāq

vo kyā kare ġharīb jo jiine se tañg ho

kaafī hai boriyā hī faqīroñ ke vāste

ma.ayūb hai jo sheroñ ke ghar meñ palañg ho

laḌne ko dil jo chāhe to āñkheñ laḌā.iye

ho jañg bhī agar to mazedār jañg ho

jo dost haiñ vo māñgte haiñ sulh kī duā

dushman ye chāhte haiñ ki aapas meñ jañg ho

koī mare kisī ko ḳhushī ho ḳhudā kī shaan

mātam kisī jagah ho kahīñ nāch-rañg ho

gulzar mein jo dur gul-e-lala-rang ho

wo be-hijabiyan hon ki nargis bhi dang ho

sayyaad o baghban mein bahut hoti hai salah

aisa na ho kahin gul o bulbul mein jang ho

afsos maut bhi nahin aati shab-e-firaq

wo kya kare gharib jo jine se tang ho

kafi hai boriya hi faqiron ke waste

mayub hai jo sheron ke ghar mein palang ho

laDne ko dil jo chahe to aankhen laDaiye

ho jang bhi agar to mazedar jang ho

jo dost hain wo mangte hain sulh ki dua

dushman ye chahte hain ki aapas mein jang ho

koi mare kisi ko KHushi ho KHuda ki shan

matam kisi jagah ho kahin nach-rang ho