gum dhundlakon mein hui rahguzar tere baad

gum dhuñdlakoñ meñ huī rāhguzar tere ba.ad

ruk gayā jaise sitāroñ kā safar tere ba.ad

tāb-e-nazzāra kahāñ thī tirī jalvat meñ hameñ

DhūñDhtī hai tirī sūrat ko nazar tere ba.ad

dekhte dekhte andāz-e-gulistāñ badlā

phuul the phuul shajar the na shajar tere ba.ad

yuuñ to dekhe the bahut ruup jahāñ ke ham ne

vo bhī ik ruup thā jo aayā nazar tere ba.ad

aarzū le ke tirī chal to paḌe the ghar se

ab ye mushkil hai ki ham jaa.eñ kidhar tere ba.ad

fan ko suulī pe chaḌhāyā gayā fankār ke saath

qarya qarya bikī nāmūs-e-hunar tere ba.ad

kis qadar thā rag-e-jāñ meñ tū hamārī paivast

is haqīqat kī huī ham ko ḳhabar tere ba.ad

hai ye zulmat hī muqaddar to pukāreñ kis ko

kis se ma.alūm kareñ apnī ḳhabar tere ba.ad

yuuñ farāġhat hai har ik kaam se ham ko jaise

ḳhatm hai silsila-e-shām-o-sahar tere ba.ad

raunaqeñ tujh se thiiñ saarī so tire saath ga.iiñ

shahar kā shahar huā ek khañDar tere ba.ad

kaash ho saktā kisī tarah tujhe bhī ma.alūm

haal 'iqbāl' kā hai kitnā digar tere ba.ad

gum dhundlakon mein hui rahguzar tere baad

ruk gaya jaise sitaron ka safar tere baad

tab-e-nazzara kahan thi teri jalwat mein hamein

DhunDhti hai teri surat ko nazar tere baad

dekhte dekhte andaz-e-gulistan badla

phul the phul shajar the na shajar tere baad

yun to dekhe the bahut rup jahan ke hum ne

wo bhi ek rup tha jo aaya nazar tere baad

aarzu le ke teri chal to paDe the ghar se

ab ye mushkil hai ki hum jaen kidhar tere baad

fan ko suli pe chaDhaya gaya fankar ke sath

qarya qarya biki namus-e-hunar tere baad

kis qadar tha rag-e-jaan mein tu hamari paiwast

is haqiqat ki hui hum ko KHabar tere baad

hai ye zulmat hi muqaddar to pukaren kis ko

kis se malum karen apni KHabar tere baad

yun faraghat hai har ek kaam se hum ko jaise

KHatm hai silsila-e-sham-o-sahar tere baad

raunaqen tujh se thin sari so tere sath gain

shahar ka shahar hua ek khanDar tere baad

kash ho sakta kisi tarah tujhe bhi malum

haal 'iqbaal' ka hai kitna digar tere baad