gunah-e-jurat-e-tadbir kar raha hun main

gunāh-e-jur.at-e-tadbīr kar rahā huuñ maiñ

ye kis qimāsh kī taqsīr kar rahā huuñ maiñ

maiñ jāntā huuñ alāmat hai zo.af himmat kī

jise nasīb se ta.abīr kar rahā huuñ maiñ

abhī tadabbur-o-tadbīr kā nahīñ mauqa.a

abhī himāyat-e-taqdīr kar rahā huuñ maiñ

hujūm-e-hashr meñ kholūñgā adl kā daftar

abhī to faisle tahrīr kar rahā huuñ maiñ

javāb dene kī aadat nahīñ ḳhudā ko agar

to kyā parastish-e-tasvīr kar rahā huuñ maiñ

tabāh ho ke haqā.eq ke khurdure-pan se

tasavvurāt kī ta.amīr kar rahā huuñ maiñ

ḳhudā ke aage 'adam' zikr-e-azmat-e-insāñ

ġhalat maqām pe taqrīr kar rahā huuñ maiñ

gunah-e-jurat-e-tadbir kar raha hun main

ye kis qimash ki taqsir kar raha hun main

main jaanta hun alamat hai zoaf himmat ki

jise nasib se tabir kar raha hun main

abhi tadabbur-o-tadbir ka nahin mauqa

abhi himayat-e-taqdir kar raha hun main

hujum-e-hashr mein kholunga adl ka daftar

abhi to faisle tahrir kar raha hun main

jawab dene ki aadat nahin KHuda ko agar

to kya parastish-e-taswir kar raha hun main

tabah ho ke haqaeq ke khurdure-pan se

tasawwuraat ki tamir kar raha hun main

KHuda ke aage 'adam' zikr-e-azmat-e-insan

ghalat maqam pe taqrir kar raha hun main