ghuncha-e-dil ki bikharta bhi dikhai na diya

ġhuncha-e-dil ki bikhartā bhī dikhā.ī na diyā

aisā bikhrā ki ishārā bhī dikhā.ī na diyā

kis ke ham-rāh nazar aatā thā tanhā tanhā

kis se bachhḌā huuñ ki tanhā bhī dikhā.ī na diyā

raushnī kī vo chakā-chauñdh thī āñkhoñ meñ ki ham

shahr se nikle to sahrā bhī dikhā.ī na diyā

sard-mehrī-e-zamāna kī sulagtī huī aag

kyā balā thī ki dhuāñ sā bhī dikhā.ī na diyā

un kitāboñ pe to ham ne bhī kiyā hai kuchh kaam

jin meñ ik harf-e-tamannā bhī dikhā.ī na diyā

bas chale the ki ġhubār-e-rah-e-manzil uTThā

chehre vo badle ki apnā bhī dikhā.ī na diyā

raat bhar ḳhuun ke dariyā meñ nahāyā ḳhurshīd

dāman-e-sub.h pe dhabbā bhī dikhā.ī na diyā

saarā aalam thā ki tārīk nazar aatā thā

aur 'mahshar' ko dhuñdlakā bhī dikhā.ī na diyā

ghuncha-e-dil ki bikharta bhi dikhai na diya

aisa bikhra ki ishaara bhi dikhai na diya

kis ke ham-rah nazar aata tha tanha tanha

kis se bachhDa hun ki tanha bhi dikhai na diya

raushni ki wo chaka-chaundh thi aankhon mein ki hum

shahr se nikle to sahra bhi dikhai na diya

sard-mehri-e-zamana ki sulagti hui aag

kya bala thi ki dhuan sa bhi dikhai na diya

un kitabon pe to hum ne bhi kiya hai kuchh kaam

jin mein ek harf-e-tamanna bhi dikhai na diya

bas chale the ki ghubar-e-rah-e-manzil uTTha

chehre wo badle ki apna bhi dikhai na diya

raat bhar KHun ke dariya mein nahaya KHurshid

daman-e-subh pe dhabba bhi dikhai na diya

sara aalam tha ki tarik nazar aata tha

aur 'mahshar' ko dhundlaka bhi dikhai na diya