ghuncha-e-wasl sar-e-sham khila de aa kar

ġhuncha-e-vasl sar-e-shām khilā de aa kar

hijr kī rut meñ koī muzhda sunā de aa kar

raqs jaarī hai lahū kā mirī shiryānoñ meñ

barbat-e-rūh meñ āvāz milā de aa kar

log mar jaate haiñ be-chāra-garī ke hote

dam-e-īsā bhī nahīñ ab ki jilā de aa kar

isī ummīd pe sab ahl-e-karam baiThe haiñ

koī saa.il kī tarah aa.e sadā de aa kar

muskurā kar mirī ġhazloñ ko paḌhā kartā hai

sher apne bhī kabhī yaar sunā de aa kar

naav kāġhaz kī liye baiThā huuñ jaane kab se

aa idhar sail-e-ravāñ is ko bahā de aa kar

ghuncha-e-wasl sar-e-sham khila de aa kar

hijr ki rut mein koi muzhda suna de aa kar

raqs jari hai lahu ka meri shiryanon mein

barbat-e-ruh mein aawaz mila de aa kar

log mar jate hain be-chaara-gari ke hote

dam-e-isa bhi nahin ab ki jila de aa kar

isi ummid pe sab ahl-e-karam baiThe hain

koi sail ki tarah aae sada de aa kar

muskura kar meri ghazlon ko paDha karta hai

sher apne bhi kabhi yar suna de aa kar

naw kaghaz ki liye baiTha hun jaane kab se

aa idhar sail-e-rawan is ko baha de aa kar