ghuncha jo sar-e-shaKH chaTakte hue dekha

ġhuncha jo sar-e-shāḳh chaTakte hue dekhā

pahlū meñ bahut dil ko dhaḌakte hue dekhā

mehñdī-rache hāthoñ ne uThāyā hī thā ghūñghaT

ik shola-e-javvāla lapakte hue dekhā

vo tere bichhaḌne kā samāñ yaad jab aayā

biite hue lamhoñ ko sisakte hue dekhā

bhūlā nahīñ ehsās tire lams kī ḳhushbū

tanhā.ī meñ anfās mahakte hue dekhā

khīñche hue ab tiir kamāñ meñ hai vo bālak

āġhosh meñ jis ko na humakte hue dekhā

jab jab bhī charāġhoñ kī laveñ ham ne baḌhā.īñ

kyā kyā na havāoñ ko sanakte hue dekhā

ghuncha jo sar-e-shaKH chaTakte hue dekha

pahlu mein bahut dil ko dhaDakte hue dekha

mehndi-rache hathon ne uThaya hi tha ghunghaT

ek shola-e-jawwala lapakte hue dekha

wo tere bichhaDne ka saman yaad jab aaya

bite hue lamhon ko sisakte hue dekha

bhula nahin ehsas tere lams ki KHushbu

tanhai mein anfas mahakte hue dekha

khinche hue ab tir kaman mein hai wo baalak

aaghosh mein jis ko na humakte hue dekha

jab jab bhi charaghon ki lawen hum ne baDhain

kya kya na hawaon ko sanakte hue dekha