guzar gae hain jo din un ko yaad karna kya

guzar ga.e haiñ jo din un ko yaad karnā kyā

ye zindagī ke liye roz roz marnā kyā

mirī nazar meñ ga.e mausamoñ ke rañg bhī haiñ

jo aane vaale haiñ un mausamoñ se Darnā kyā

bujhe hue dar-o-dīvār ko bhī raunaq de

ye ḳhvāb ban ke mirī aañkh se guzarnā kyā

misāl-e-ashk sar-e-dāman-e-hayāt huuñ maiñ

mirī ravānī hī kyā aur mirā Thaharnā kyā

hujūm-e-jalva se jis raah par charāġhāñ thā

jo bujh ga.ī hai to us raah se guzarnā kyā

misāl-e-naqsh-e-qadam apnī hairatoñ meñ huuñ gum

vo jā chukā hai to phir intizār karnā kyā

guzar rahī hai ġhanīmat hai zindagī maanā

magar ye ek hī andāz se guzarnā kyā

guzar gae hain jo din un ko yaad karna kya

ye zindagi ke liye roz roz marna kya

meri nazar mein gae mausamon ke rang bhi hain

jo aane wale hain un mausamon se Darna kya

bujhe hue dar-o-diwar ko bhi raunaq de

ye KHwab ban ke meri aankh se guzarna kya

misal-e-ashk sar-e-daman-e-hayat hun main

meri rawani hi kya aur mera Thaharna kya

hujum-e-jalwa se jis rah par charaghan tha

jo bujh gai hai to us rah se guzarna kya

misal-e-naqsh-e-qadam apni hairaton mein hun gum

wo ja chuka hai to phir intizar karna kya

guzar rahi hai ghanimat hai zindagi mana

magar ye ek hi andaz se guzarna kya