guzar gaya jo zamana ajib lagta hai

guzar gayā jo zamāna ajiib lagtā hai

ga.ī rutoñ kā fasāna ajiib lagtā hai

tum apne saath hī le jaao apnī yādoñ ko

ki chashm-e-nam kā chhupānā ajiib lagtā hai

gilā kiyā na kabhī tum se bevafā.ī kā

laboñ pe aah kā aanā ajiib lagtā hai

na haañ na huuñ na koī silsila nigāhoñ kā

ye ḳhāmushī kā fasāna ajiib lagtā hai

kabhī zamāne kī har shai se pyaar thā mujh ko

tire baġhair zamāna ajiib lagtā hai

har ek zaḳhm mirā phuul ban gayā shāyad

ki ab bahār kā aanā ajiib lagtā hai

kisī ke pyaar kā sho.ala bujhā diyā thā 'nigār'

vo sho.ala phir se jalānā ajiib lagtā hai

guzar gaya jo zamana ajib lagta hai

gai ruton ka fasana ajib lagta hai

tum apne sath hi le jao apni yaadon ko

ki chashm-e-nam ka chhupana ajib lagta hai

gila kiya na kabhi tum se bewafai ka

labon pe aah ka aana ajib lagta hai

na han na hun na koi silsila nigahon ka

ye KHamushi ka fasana ajib lagta hai

kabhi zamane ki har shai se pyar tha mujh ko

tere baghair zamana ajib lagta hai

har ek zaKHm mera phul ban gaya shayad

ki ab bahaar ka aana ajib lagta hai

kisi ke pyar ka shoala bujha diya tha 'nigar'

wo shoala phir se jalana ajib lagta hai