guzar is hujra-e-gardun se ho kidhar apna

guzar is hujra-e-gardūñ se ho kīdhar apnā

qaid-ḳhāna hai 'ajab gumbad-e-be-dar apnā

shakl rahne kī hai bastī meñ ye us bin apnī

jaise jangal meñ banātā hai koī ghar apnā

shab kī be-tābiyāñ kyā kahiye ki dekhā jo sahar

TukḌe TukḌe nazar aayā hameñ bistar apnā

ham-nashīñ us ko jo laanā hai to lā jald ki ham

thāme baiThe raheñ kab tak dil-e-muztar apnā

vo ga.e din ki sadā mai-kada-e-hastī meñ

bāda-e-aish se labrez thā sāġhar apnā

tāb-e-nazzāra tirī laa.e na ḳhurshīd zarā

haath jab tak ki na rakh le vo jabīñ par apnā

deñge sar 'ishq ke saude meñ agarche ham ko

is meñ nuqsāñ nazar aatā hai sarāsar apnā

hai zamīñ ḳhuub ġhazal-dar-ġhazal is ko kahiye

bas ki mā'mūl hai 'jur.at' yahī aksar apnā

guzar is hujra-e-gardun se ho kidhar apna

qaid-KHana hai 'ajab gumbad-e-be-dar apna

shakl rahne ki hai basti mein ye us bin apni

jaise jangal mein banata hai koi ghar apna

shab ki be-tabiyan kya kahiye ki dekha jo sahar

TukDe TukDe nazar aaya hamein bistar apna

ham-nashin us ko jo lana hai to la jald ki hum

thame baiThe rahen kab tak dil-e-muztar apna

wo gae din ki sada mai-kada-e-hasti mein

baada-e-aish se labrez tha saghar apna

tab-e-nazzara teri lae na KHurshid zara

hath jab tak ki na rakh le wo jabin par apna

denge sar 'ishq ke saude mein agarche hum ko

is mein nuqsan nazar aata hai sarasar apna

hai zamin KHub ghazal-dar-ghazal is ko kahiye

bas ki ma'mul hai 'jurat' yahi aksar apna