guzar jae jo aankhon se wo phir manzar nahin rahta

guzar jaa.e jo āñkhoñ se vo phir manzar nahīñ rahtā

judā ho kar judā hone kā koī Dar nahīñ rahtā

miTeñ bechainiyāñ āḳhir dar-o-dīvār kī kaise

gharoñ meñ log rahte haiñ diloñ meñ ghar nahīñ rahtā

dikhā.ī kis tarah de shahr meñ koī mujhe āḳhir

sivā us ke nazar meñ ab koī manzar nahīñ rahtā

ye hairat hai ke mujh ko ġham nahīñ hai us ko kho kar bhī

pareshāñ vo bhī hai vo ḳhush mujhe pā kar nahīñ rahtā

nahīñ detī ijāzat jhuuT kahne kī ye ḳhuddārī

agar sach bolte haiñ mahfiloñ meñ sar nahīñ rahtā

jise vo 'shoḳh' apne haath se chhū kar guzar jaa.e

vo pathar phir ziyāda der tak patthar nahīñ rahtā

guzar jae jo aankhon se wo phir manzar nahin rahta

juda ho kar juda hone ka koi Dar nahin rahta

miTen bechainiyan aaKHir dar-o-diwar ki kaise

gharon mein log rahte hain dilon mein ghar nahin rahta

dikhai kis tarah de shahr mein koi mujhe aaKHir

siwa us ke nazar mein ab koi manzar nahin rahta

ye hairat hai ke mujh ko gham nahin hai us ko kho kar bhi

pareshan wo bhi hai wo KHush mujhe pa kar nahin rahta

nahin deti ijazat jhuT kahne ki ye KHuddari

agar sach bolte hain mahfilon mein sar nahin rahta

jise wo 'shoKH' apne hath se chhu kar guzar jae

wo pathar phir ziyaada der tak patthar nahin rahta