guzar jata hai yun daur-e-shabab aahista aahista

guzar jaatā hai yuuñ daur-e-shabāb āhista āhista

ki utre jis tarah kaif-e-sharāb āhista āhista

shafaq hotī hai jaise muntaqil shab ke añdheroñ meñ

badaltī jaatī hai tābīr-e-ḳhvāb āhista āhista

chalegā silsila kuchh aur abhī ḳhāna-ḳharābī kā

ki baste haiñ tabāh-e-inqalāb āhista āhista

jarā.em ke bagūle rafta rafta ban ga.e tūfāñ

fasīl-e-shahr par TuuTā azaab āhista āhista

ravish yak-laḳht badle yuuñ kabhī hote nahīñ dekhā

hamārā taur badlegā janāb āhista āhista

tasāhul ham ne bartā yā taġhāful aap kī ḳhū hai

milegā in savāloñ kā javāb āhista āhista

achānak rū-numā.ī se nazar ḳhīra na ho jaa.e

zarā sarkā.iye ruḳh se naqāb āhista āhista

paḌhīñ logoñ ne jis par talḳhiyāñ umr-e-guzishta kī

mirā chehra banā aisī kitāb āhista āhista

ġham-e-daurāñ kī roz-afzūñ sitamgārī ne ai 'mohsin'

hamārī ziist kar Daalī azaab āhista āhista āhista

guzar jata hai yun daur-e-shabab aahista aahista

ki utre jis tarah kaif-e-sharab aahista aahista

shafaq hoti hai jaise muntaqil shab ke andheron mein

badalti jati hai tabir-e-KHwab aahista aahista

chalega silsila kuchh aur abhi KHana-KHarabi ka

ki baste hain tabah-e-inqalab aahista aahista

jaraem ke bagule rafta rafta ban gae tufan

fasil-e-shahr par TuTa azab aahista aahista

rawish yak-laKHt badle yun kabhi hote nahin dekha

hamara taur badlega janab aahista aahista

tasahul hum ne barta ya taghaful aap ki KHu hai

milega in sawalon ka jawab aahista aahista

achanak ru-numai se nazar KHira na ho jae

zara sarkaiye ruKH se naqab aahista aahista

paDhin logon ne jis par talKHiyan umr-e-guzishta ki

mera chehra bana aisi kitab aahista aahista

gham-e-dauran ki roz-afzun sitamgari ne ai 'mohsin'

hamari zist kar Dali azab aahista aahista aahista