guzarte dauDte lamhe hisab mein likhiye

guzarte dauḌte lamhe hisāb meñ likhiye

haqīqatoñ kī tamannā bhī ḳhvāb meñ likhiye

aziyyateñ hī na apnī kitāb meñ likhiye

sukūñ kā pal bhī to sāñsoñ ke baab meñ likhiye

har ek harf se jiine kā fan numāyāñ ho

kuchh is tarah kī ibārat nisāb meñ likhiye

har ek jumbish-e-lab aur dil kī har dhaḌkan

sadā yaqīn banī inqalāb meñ likhiye

basīratoñ kī ziyā par na harf aa jaa.e

maiñ aql-o-hosh abhī tak hijāb meñ likhiye

savāl ban ke ubharte haiñ dard ke sūraj

sukūñ kā chāñd hī sab ke javāb meñ likhiye

milī haiñ din kī adhūrī masāfateñ shab ko

chamakte shām-o-sahar kis hisāb meñ likhiye

sulagte jism kā ehsās dard ke jugnū

añdherī shab ke guzarte hisāb meñ likhiye

guzarte dauDte lamhe hisab mein likhiye

haqiqaton ki tamanna bhi KHwab mein likhiye

aziyyaten hi na apni kitab mein likhiye

sukun ka pal bhi to sanson ke bab mein likhiye

har ek harf se jine ka fan numayan ho

kuchh is tarah ki ibarat nisab mein likhiye

har ek jumbish-e-lab aur dil ki har dhaDkan

sada yaqin bani inqalab mein likhiye

basiraton ki ziya par na harf aa jae

main aql-o-hosh abhi tak hijab mein likhiye

sawal ban ke ubharte hain dard ke suraj

sukun ka chand hi sab ke jawab mein likhiye

mili hain din ki adhuri masafaten shab ko

chamakte sham-o-sahar kis hisab mein likhiye

sulagte jism ka ehsas dard ke jugnu

andheri shab ke guzarte hisab mein likhiye