guzarte din ke dukhon ka pata to deta tha

guzarte din ke dukhoñ kā pata to detā thā

vo shaam Dhalne se pahle sadā to detā thā

hujūm-e-kār meñ pal bhar bhī ik bahāne se

vo apne qurb kā jaadū jagā to detā thā

sharīk-e-rāh thā vo ham-safar na thā phir bhī

qadam qadam pe mujhe hausla to detā thā

mujhī ko miltī na thī fursat-e-pazīrā.ī

vo apne sach kā mujhe aa.ina to detā thā

vo chāñd aur kisī āsmāñ kā thā lekin

ufuq ufuq ko mire jagmagā to detā thā

maiñ us kī aañch meñ tap kar na ho sakā kundan

vo apne shola-e-jāñ kī havā to detā thā

guzarte din ke dukhon ka pata to deta tha

wo sham Dhalne se pahle sada to deta tha

hujum-e-kar mein pal bhar bhi ek bahane se

wo apne qurb ka jadu jaga to deta tha

sharik-e-rah tha wo ham-safar na tha phir bhi

qadam qadam pe mujhe hausla to deta tha

mujhi ko milti na thi fursat-e-pazirai

wo apne sach ka mujhe aaina to deta tha

wo chand aur kisi aasman ka tha lekin

ufuq ufuq ko mere jagmaga to deta tha

main us ki aanch mein tap kar na ho saka kundan

wo apne shola-e-jaan ki hawa to deta tha