guzarti sham ne phir se pukara

guzartī shaam ne phir se pukārā

girā hai aañkh se koī sitāra

churā lo vaqt kī chādar se mujh ko

chhupā lo aañkh meñ apnī ḳhudārā

samundar soch meñ Duubā huā hai

kisī par haar baiThā hai kinārā

fazā badlī huī hai shahr-e-jāñ kī

kisī ne aaj phir mujh ko pukārā

laboñ ko hai takalluf aarzū se

mirī ḳhāmoshiyāñ haiñ ik ishāra

tumhāre saath ho to zindagī hai

tumhāre baa'd rasmī sā guzārā

agarche lauT jaane kā kahā hai

nahīñ lagtā lagegā dil hamārā

taḳhayyul chāñdnī hai chāñd bhī hai

agarche tīrgī ne hai nikhārā

kise mā'lūm hai jhagḌe meñ 'nīlam'

bazāhir jiit kar bhī kaun haarā

guzarti sham ne phir se pukara

gira hai aankh se koi sitara

chura lo waqt ki chadar se mujh ko

chhupa lo aankh mein apni KHudara

samundar soch mein Duba hua hai

kisi par haar baiTha hai kinara

faza badli hui hai shahr-e-jaan ki

kisi ne aaj phir mujh ko pukara

labon ko hai takalluf aarzu se

meri KHamoshiyan hain ek ishaara

tumhaare sath ho to zindagi hai

tumhaare ba'd rasmi sa guzara

agarche lauT jaane ka kaha hai

nahin lagta lagega dil hamara

taKHayyul chandni hai chand bhi hai

agarche tirgi ne hai nikhaara

kise ma'lum hai jhagDe mein 'nilam'

bazahir jit kar bhi kaun haara