guzishta din ki ek taswir maine ghar pe rakkhi thi

guzishta din kī ik tasvīr maiñ ne ghar pe rakkhī thī

vo bas is baat ko le ke hī dhartī sar pe rakkhī thī

maro yā maar do gar bach ga.e to phir raho tayyār

ajab shart-e-hukūmat thī ki jo lashkar pe rakkhī thī

tire dar se uThī to phir kahīñ bhī ye na Tik pā.īñ

nigah kuchh is qadar tere tan-e-marmar pe rakkhī thī

sabhī daanā tavānā dast-basta the khaḌe saf meñ

sabhī kī chashm-e-pur-ḳhvāhish vahīñ mimbar pe rakkhī thī

qadam zarra barābar bhī baḌhā paa.eñ nahīñ jibrīl

hazāroñ quvvat-e-parvāz in shahpar pe rakkhī thī

guzishta din ki ek taswir main ne ghar pe rakkhi thi

wo bas is baat ko le ke hi dharti sar pe rakkhi thi

maro ya mar do gar bach gae to phir raho tayyar

ajab shart-e-hukumat thi ki jo lashkar pe rakkhi thi

tere dar se uThi to phir kahin bhi ye na Tik pain

nigah kuchh is qadar tere tan-e-marmar pe rakkhi thi

sabhi dana tawana dast-basta the khaDe saf mein

sabhi ki chashm-e-pur-KHwahish wahin mimbar pe rakkhi thi

qadam zarra barabar bhi baDha paen nahin jibril

hazaron quwwat-e-parwaz in shahpar pe rakkhi thi