hail thi bich mein jo razai tamam shab

haa.il thī biich meñ jo razā.ī tamām shab

is ġham se ham ko niiñd na aa.ī tamām shab

kī yaas se havas ne laḌā.ī tamām shab

tum ne to ḳhuub raah dikhā.ī tamām shab

phir bhī to ḳhatm ho na sakī aarzū kī baat

har chand ham ne un ko sunā.ī tamām shab

bebāk milte hī jo hue ham to sharm se

aañkh us parī ne phir na milā.ī tamām shab

dil ḳhuub jāntā hai ki tum kis ḳhayāl se

karte rahe adū kī burā.ī tamām shab

phir shaam hī se kyuuñ vo chale the chhuḌā ke haath

dukhtī rahī jo un kī kalā.ī tamām shab

'hasrat' se kuchh vo aate hī aise hue ḳhafā

phir ho sakī na un se safā.ī tamām shab

hail thi bich mein jo razai tamam shab

is gham se hum ko nind na aai tamam shab

ki yas se hawas ne laDai tamam shab

tum ne to KHub rah dikhai tamam shab

phir bhi to KHatm ho na saki aarzu ki baat

har chand hum ne un ko sunai tamam shab

bebak milte hi jo hue hum to sharm se

aankh us pari ne phir na milai tamam shab

dil KHub jaanta hai ki tum kis KHayal se

karte rahe adu ki burai tamam shab

phir sham hi se kyun wo chale the chhuDa ke hath

dukhti rahi jo un ki kalai tamam shab

'hasrat' se kuchh wo aate hi aise hue KHafa

phir ho saki na un se safai tamam shab