hakim-e-shahr ki KHwahish ki hukumat ki jae

hākim-e-shahr kī ḳhvāhish ki hukūmat kī jaa.e

varna hālāt to aise haiñ ki hijrat kī jaa.e

ab to dene lage bachche bhī baḌoñ ko gaalī

jis ke bā'is ye huā is kī mazammat kī jaa.e

ab zarūrat hai ki sab mil ke bachā.eñ is ko

Dūbtī naav meñ hargiz na siyāsat kī jaa.e

vo to kahtā hai ki bas mujh ko mu'āfī de kar

shahr vāloñ meñ kisī se na ri'āyat kī jaa.e

maiñ to kahtā huuñ ki aivān se bāhar aa kar

ḳhilqat-e-shahr ke dil par bhī hukūmat kī jaa.e

tū to suntā hī nahīñ dost hamārī bāteñ

lekin itnā to batā kis se shikāyat kī jaa.e

ek hī 'ishq hai aur 'ishq kā matlab ye hai

is ke saa.e meñ ka.ī baar mohabbat kī jaa.e

daḳhl-andāz na ho is meñ zamāna 'anjum'

jab bhī kī jaa.e mohabbat to mohabbat kī jaa.e

hakim-e-shahr ki KHwahish ki hukumat ki jae

warna haalat to aise hain ki hijrat ki jae

ab to dene lage bachche bhi baDon ko gali

jis ke ba'is ye hua is ki mazammat ki jae

ab zarurat hai ki sab mil ke bachaen is ko

Dubti naw mein hargiz na siyasat ki jae

wo to kahta hai ki bas mujh ko mu'afi de kar

shahr walon mein kisi se na ri'ayat ki jae

main to kahta hun ki aiwan se bahar aa kar

KHilqat-e-shahr ke dil par bhi hukumat ki jae

tu to sunta hi nahin dost hamari baaten

lekin itna to bata kis se shikayat ki jae

ek hi 'ishq hai aur 'ishq ka matlab ye hai

is ke sae mein kai bar mohabbat ki jae

daKHl-andaz na ho is mein zamana 'anjum'

jab bhi ki jae mohabbat to mohabbat ki jae