haal badla hi nahin ab tak dil-e-dil-gir ka

haal badlā hī nahīñ ab tak dil-e-dil-gīr kā

kuchh sabab batlā.īyegā aap is tāḳhīr kā

ham fanā kī had se aage baḌh ga.e the ishq meñ

is se aage kyā likheñ ham qissa ab tadbīr kā

maiñ bahā aayā huuñ ḳhat gañgā meñ apne pyaar ke

jo kaleja se lagī hai kyā karūñ tasvīr kā

kal talak da.avā thā badleñge mizāj-e-vaqt aap

aaj ronā ro rahe haiñ aap bhī taqdīr kā

kyā samajh pā.egā vo sho.aloñ pe chalne kā maza

ilm hī jis ko nahīñ ho ishq kī tāsīr kā

āshiqoñ ko marham-e-nāsūr de kar vo ga.e

ye baḌā ehsān hai ham par hamāre miir kā

ruuh kā panchhī taḌaptā hai badan kī qaid meñ

ham to ab sunte nahīñ haiñ shor bhī zanjīr kā

nāznīñ poshīda hai mere qalam kī bāhoñ meñ

tū faqat matlab samajh is meñ chhapī tahrīr kā

apne bachchoñ ko sunāo tum hamārī dāstāñ

ab purānā ho gayā hai qissa rāñjhā hiir kā

har javānī ko buḌhāpā ek din aatā hī hai

rañg ab uḌne lagā hai ziist kī tahrīr kā

haal badla hi nahin ab tak dil-e-dil-gir ka

kuchh sabab batlaiyega aap is taKHir ka

hum fana ki had se aage baDh gae the ishq mein

is se aage kya likhen hum qissa ab tadbir ka

main baha aaya hun KHat ganga mein apne pyar ke

jo kaleja se lagi hai kya karun taswir ka

kal talak dawa tha badlenge mizaj-e-waqt aap

aaj rona ro rahe hain aap bhi taqdir ka

kya samajh paega wo shoalon pe chalne ka maza

ilm hi jis ko nahin ho ishq ki tasir ka

aashiqon ko marham-e-nasur de kar wo gae

ye baDa ehsan hai hum par hamare mir ka

ruh ka panchhi taDapta hai badan ki qaid mein

hum to ab sunte nahin hain shor bhi zanjir ka

naznin poshida hai mere qalam ki bahon mein

tu faqat matlab samajh is mein chhapi tahrir ka

apne bachchon ko sunao tum hamari dastan

ab purana ho gaya hai qissa ranjha hir ka

har jawani ko buDhapa ek din aata hi hai

rang ab uDne laga hai zist ki tahrir ka