haal-e-dil-e-be-qarar hai aur

hāl-e-dil-e-be-qarār hai aur

shāyad ki ḳhayāl-e-yār hai aur

ai diida na ro ki tujh par ik shab

ranj-e-shab-e-intizār hai aur

jaagā hai kahīñ magar tū dī-shab

āñkhoñ meñ tirī ḳhumār hai aur

farhād ne dekhte hī gulgūñ

jaanā thā ki ye savār hai aur

kūche meñ tire mirī nigah kā

har gosha umīd-vār hai aur

hai āḳhir-e-umr is chaman meñ

do chaar hī din bahār hai aur

nāvak kā tire shikār-gah meñ

har goshe nayā shikār hai aur

vo ham se kare hai kal kā vā'da

auroñ se vahāñ qarār hai aur

kyā laale se nisbat us ko sach hai

dāġh-e-dil-e-dāġhdār hai aur

auroñ sā na jaan mujh ko pyāre

ye āshiq-e-jāñ-nisār hai aur

ai 'mus.hafī' is meñ chup hī rah tū

suntā hai ye rozgār hai aur

haal-e-dil-e-be-qarar hai aur

shayad ki KHayal-e-yar hai aur

ai dida na ro ki tujh par ek shab

ranj-e-shab-e-intizar hai aur

jaga hai kahin magar tu di-shab

aankhon mein teri KHumar hai aur

farhad ne dekhte hi gulgun

jaana tha ki ye sawar hai aur

kuche mein tere meri nigah ka

har gosha umid-war hai aur

hai aaKHir-e-umr is chaman mein

do chaar hi din bahaar hai aur

nawak ka tere shikar-gah mein

har goshe naya shikar hai aur

wo hum se kare hai kal ka wa'da

auron se wahan qarar hai aur

kya lale se nisbat us ko sach hai

dagh-e-dil-e-daghdar hai aur

auron sa na jaan mujh ko pyare

ye aashiq-e-jaan-nisar hai aur

ai 'mushafi' is mein chup hi rah tu

sunta hai ye rozgar hai aur