haal-e-dil tujh pe aashkar kiya

hāl-e-dil tujh pe āshkār kiyā

ziist ko apnī ḳhush-gavār kiyā

soz-e-dil kā ġham-e-mohabbat kā

tazkira ham ne baar baar kiyā

ham na ġhāfil rahe kisī lamha

apnī har saañs kā shumār kiyā

ho ga.e ham halāk ḳhud lekin

bāġh-e-hastī ko pur-bahār kiyā

kashmakash meñ guzār dī sab umr

ham ne kab aish iḳhtiyār kiyā

kī na taqlīd ham ne ġhairoñ kī

apne mālik pe e.atibār kiyā

jab bahut muztarib hue 'sāqī'

apnī hastī ko tār-tār kiyā

haal-e-dil tujh pe aashkar kiya

zist ko apni KHush-gawar kiya

soz-e-dil ka gham-e-mohabbat ka

tazkira hum ne bar bar kiya

hum na ghafil rahe kisi lamha

apni har sans ka shumar kiya

ho gae hum halak KHud lekin

bagh-e-hasti ko pur-bahaar kiya

kashmakash mein guzar di sab umr

hum ne kab aish iKHtiyar kiya

ki na taqlid hum ne ghairon ki

apne malik pe eatibar kiya

jab bahut muztarib hue 'saqi'

apni hasti ko tar-tar kiya