haal-e-hijab qabil-e-sharh-o-bayan nahin

hāl-e-hijāb qābil-e-sharh-o-bayāñ nahīñ

aañsū na Tapke sun ke ye vo dāstāñ nahīñ

dil meñ jigar meñ siine meñ pahlū meñ aañkh meñ

ai 'ishq terī sho.ala-fishānī kahāñ nahīñ

karte ho qatl bul-havasoñ ko ġhazab hai ye

samjhe ho tum magar koī 'āshiq yahāñ nahīñ

pūchho na hāl-e-zār mirā tum se kyā kahūñ

gum-karda rāh-e-bāġh huuñ yaad āshiyāñ nahīñ

ham bhī ḳharīd lete tire zulm ke liye

bāzār-e-dahr meñ koī dil kī dukāñ nahīñ

dete haiñ chheḌ chheḌ ke kyuuñ mujh ko gāliyāñ

samjhe hue haiñ vo mire muñh meñ zabān nahīñ

vo aur mere ghar meñ chale aa.eñ ḳhud-baḳhud

sar par mire hijāb magar āsmāñ nahīñ

haal-e-hijab qabil-e-sharh-o-bayan nahin

aansu na Tapke sun ke ye wo dastan nahin

dil mein jigar mein sine mein pahlu mein aankh mein

ai 'ishq teri shoala-fishani kahan nahin

karte ho qatl bul-hawason ko ghazab hai ye

samjhe ho tum magar koi 'ashiq yahan nahin

puchho na haal-e-zar mera tum se kya kahun

gum-karda rah-e-bagh hun yaad aashiyan nahin

hum bhi KHarid lete tere zulm ke liye

bazar-e-dahr mein koi dil ki dukan nahin

dete hain chheD chheD ke kyun mujh ko galiyan

samjhe hue hain wo mere munh mein zaban nahin

wo aur mere ghar mein chale aaen KHud-baKHud

sar par mere hijab magar aasman nahin