humne khulne na diya be-sar-o-samani ko

ham ne khulne na diyā be-sar-o-sāmānī ko

kahāñ le jaa.eñ magar shahr kī vīrānī ko

sirf guftār se zaḳhmoñ kā rafū chāhte haiñ

ye siyāsat hai to phir kyā kahīñ nādānī ko

koī taqsīm na.ī kar ke chalā jaatā hai

jo bhī aatā hai mire ghar kī nigahbānī ko

ab kahāñ jā.ūñ ki ghar meñ bhī huuñ dushman apnā

aur bāhar mirā dushman hai nigahbānī ko

be-hisī vo hai ki kartā nahīñ insāñ mahsūs

apnī hī ruuh meñ aa.ī huī tuġhyānī ko

aaj bhī us ko farāz aaj bhī aalī hai vahī

vahī sajda jo kare vaqt kī sultānī ko

aaj yūsuf pe agar vaqt ye laa.e ho to kyā

kal tumhīñ taḳht bhī doge isī zindānī ko

sub.h khalne kī ho yā shaam bikhar jaane kī

ham ne ḳhushbū hī kiyā apnī pareshānī ko

vo bhī har-ān nayā merī mohabbat bhī na.ī

jalva-e-husn kashish hai mirī hairānī ko

kūza-e-harf meñ laayā huuñ tumhārī ḳhātir

ruuh par utre hue ek ajab paanī ko

hum ne khulne na diya be-sar-o-samani ko

kahan le jaen magar shahr ki virani ko

sirf guftar se zaKHmon ka rafu chahte hain

ye siyasat hai to phir kya kahin nadani ko

koi taqsim nai kar ke chala jata hai

jo bhi aata hai mere ghar ki nigahbani ko

ab kahan jaun ki ghar mein bhi hun dushman apna

aur bahar mera dushman hai nigahbani ko

be-hisi wo hai ki karta nahin insan mahsus

apni hi ruh mein aai hui tughyani ko

aaj bhi us ko faraaz aaj bhi aali hai wahi

wahi sajda jo kare waqt ki sultani ko

aaj yusuf pe agar waqt ye lae ho to kya

kal tumhin taKHt bhi doge isi zindani ko

subh khalne ki ho ya sham bikhar jaane ki

hum ne KHushbu hi kiya apni pareshani ko

wo bhi har-an naya meri mohabbat bhi nai

jalwa-e-husn kashish hai meri hairani ko

kuza-e-harf mein laya hun tumhaari KHatir

ruh par utre hue ek ajab pani ko