zarron mein kunmunati hui kaenat hun

zarroñ meñ kunmunātī huī kā.enāt huuñ

jo muntazir hai jismoñ kī maiñ vo hayāt huuñ

donoñ ko pyāsā maar rahā hai koī yazīd

ye zindagī husain hai aur maiñ furāt huuñ

neza zamīñ pe gaaḌ ke ghoḌe se kuud jā

par maiñ zamīñ pe ābla-pā ḳhālī haat huuñ

kaisā falak huuñ jis pe samundar savār hai

sūraj bhī mere sar pe hai maiñ kaisī raat huuñ

andhe kueñ meñ maar ke jo pheñk aa.e the

un bhā.iyoñ se kahiyo abhī tak hayāt huuñ

aatī huī train ke jo aage rakh ga.ī

us maañ se ye na kahnā ba-qaid-e-hayāt huuñ

bāzār kā naqīb samajh kar mujhe na chheḌ

ḳhāmosh rahne de maiñ tire ghar kī baat huuñ

zarron mein kunmunati hui kaenat hun

jo muntazir hai jismon ki main wo hayat hun

donon ko pyasa mar raha hai koi yazid

ye zindagi husain hai aur main furaat hun

neza zamin pe gaD ke ghoDe se kud ja

par main zamin pe aabla-pa KHali hat hun

kaisa falak hun jis pe samundar sawar hai

suraj bhi mere sar pe hai main kaisi raat hun

andhe kuen mein mar ke jo phenk aae the

un bhaiyon se kahiyo abhi tak hayat hun

aati hui train ke jo aage rakh gai

us man se ye na kahna ba-qaid-e-hayat hun

bazar ka naqib samajh kar mujhe na chheD

KHamosh rahne de main tere ghar ki baat hun