han wahi ishq-o-mohabbat ki jila hoti hai

haañ vahī ishq-o-mohabbat kī jilā hotī hai

jo ibādat dar-e-jānāñ pe adā hotī hai

jo giraftār-e-mohabbat haiñ ye un se pūchho

naaz kyā chiiz hai kyā chiiz adā hotī hai

un kī nazroñ kī haqīqat ko koī kyā jaane

un kī nazroñ meñ har ik ġham kī davā hotī hai

kyuuñ na chehre pe malūñ ḳhāk-e-dar-e-yār ko maiñ

yahī vo ḳhaak hai jo ḳhāk-e-shifā hotī hai

rā.egāñ sajde bhī ho jaate haiñ maqbūl-e-karam

shāmil-e-hāl agar un kī razā hotī hai

jaane kyā chiiz chhupī hai tire jalvoñ meñ sanam

saarī duniyā tere jalvoñ pe fidā hotī hai

maiñ bhī huuñ ek ināyat kī nazar kā tālib

tere kūche meñ marīzoñ ko shifā hotī hai

un ke maiḳhāne ko chhū aatī hai jab fasl-e-bahār

phuul khil jaate haiñ mastī meñ havā hotī hai

ai 'fanā' miltā hai āshiq ko baqā kā paiġhām

zindagī jab rah-e-ulfat meñ fanā hotī hai

han wahi ishq-o-mohabbat ki jila hoti hai

jo ibaadat dar-e-jaanan pe ada hoti hai

jo giraftar-e-mohabbat hain ye un se puchho

naz kya chiz hai kya chiz ada hoti hai

un ki nazron ki haqiqat ko koi kya jaane

un ki nazron mein har ek gham ki dawa hoti hai

kyun na chehre pe malun KHak-e-dar-e-yar ko main

yahi wo KHak hai jo KHak-e-shifa hoti hai

raegan sajde bhi ho jate hain maqbul-e-karam

shamil-e-haal agar un ki raza hoti hai

jaane kya chiz chhupi hai tere jalwon mein sanam

sari duniya tere jalwon pe fida hoti hai

main bhi hun ek inayat ki nazar ka talib

tere kuche mein marizon ko shifa hoti hai

un ke maiKHane ko chhu aati hai jab fasl-e-bahaar

phul khil jate hain masti mein hawa hoti hai

ai 'fana' milta hai aashiq ko baqa ka paigham

zindagi jab rah-e-ulfat mein fana hoti hai