hath aata to nahin kuchh pa taqaza kar aaen

haath aatā to nahīñ kuchh pa taqāza kar aa.eñ

aur ik baar galī kā tirī pherā kar aa.eñ

niiñd ke vāste vaise bhī zarūrī hai thakan

pyaas bhaḌkā.eñ kisī saa.e kā pīchhā kar aa.eñ

lutf detī hai masīhā.ī par itnā bhī nahīñ

josh meñ apne hī bīmār ko achchhā kar aa.eñ

log mahfil meñ bulāte hue katrāte the

ab nahīñ dhaḌkā ye ḳhud se ki kahāñ kyā kar aa.eñ

kaash mil jaa.e kahīñ phir vahī ā.īna-sifat

naqsh be-rabt bahut haiñ inheñ chehra kar aa.eñ

kitnī āsānī se ham us ko bhulā sakte haiñ

bas kisī tarah use dūsroñ jaisā kar aa.eñ

ye bhī mumkin hai ki ham haar se bachne ke liye

apne dushman ke kisī vaar meñ hissa kar aa.eñ

baat maazī ko alag rakh ke bhī ho saktī hai

ab jo hālāt haiñ un par kabhī charchā kar aa.eñ

ye batā kar ki ye raunaq to zarā der kī hai

sāhib-e-bazm ke haijān ko ThanDā kar aa.eñ

kyā vajūd us kā agar koī tavajjoh hī na de

ham ki jab chāheñ use bhiiḌ kā hissa kar aa.eñ

hath aata to nahin kuchh pa taqaza kar aaen

aur ek bar gali ka teri phera kar aaen

nind ke waste waise bhi zaruri hai thakan

pyas bhaDkaen kisi sae ka pichha kar aaen

lutf deti hai masihai par itna bhi nahin

josh mein apne hi bimar ko achchha kar aaen

log mahfil mein bulate hue katraate the

ab nahin dhaDka ye KHud se ki kahan kya kar aaen

kash mil jae kahin phir wahi aaina-sifat

naqsh be-rabt bahut hain inhen chehra kar aaen

kitni aasani se hum us ko bhula sakte hain

bas kisi tarah use dusron jaisa kar aaen

ye bhi mumkin hai ki hum haar se bachne ke liye

apne dushman ke kisi war mein hissa kar aaen

baat mazi ko alag rakh ke bhi ho sakti hai

ab jo haalat hain un par kabhi charcha kar aaen

ye bata kar ki ye raunaq to zara der ki hai

sahib-e-bazm ke haijaan ko ThanDa kar aaen

kya wajud us ka agar koi tawajjoh hi na de

hum ki jab chahen use bhiD ka hissa kar aaen