hath hamare sab se unche hathon hi se gila bhi hai

haath hamāre sab se ūñche hāthoñ hī se gila bhī hai

ghar aise ko sauñp diyā jo aag bhī hai aur havā bhī hai

apnī anā kā jaal kisī din pāgal-pan meñ toḌūñgā

apnī anā ke jaal ko maiñ ne pāgal-pan meñ bunā bhī hai

diye ke jalne aur bujhne kā bhed samajh meñ aa.e to kyā

isī havā se jal bhī rahā thā isī havā se bujhā bhī hai

raushniyoñ pe paañv jamā ke chalnā ham ko aayā nahīñ

vaise dar-e-ḳhurshīd to ham par gaahe gaahe khulā bhī hai

dard kī jhil-mil raushniyoñ se baara ḳhvāb kī duurī par

ham ne dekhī ek dhanak jo sho.ala bhī hai sadā bhī hai

tez havā ke saath chalā hai zard musāfir mausam kā

os ne dāman thaam liyā to pal-do-pal ko rukā bhī hai

sāhil jaisī umar meñ ham se sāgar ne ik baat na kī

lahroñ ne to jaane kyā kyā kahā bhī hai aur sunā bhī hai

ishq to ik ilzām hai us kā vasl kā to bas naam huā

vo aayā thā qātil ban ke qatl hī kar ke gayā bhī hai

hath hamare sab se unche hathon hi se gila bhi hai

ghar aise ko saunp diya jo aag bhi hai aur hawa bhi hai

apni ana ka jal kisi din pagal-pan mein toDunga

apni ana ke jal ko main ne pagal-pan mein buna bhi hai

diye ke jalne aur bujhne ka bhed samajh mein aae to kya

isi hawa se jal bhi raha tha isi hawa se bujha bhi hai

raushniyon pe panw jama ke chalna hum ko aaya nahin

waise dar-e-KHurshid to hum par gahe gahe khula bhi hai

dard ki jhil-mil raushniyon se bara KHwab ki duri par

hum ne dekhi ek dhanak jo shoala bhi hai sada bhi hai

tez hawa ke sath chala hai zard musafir mausam ka

os ne daman tham liya to pal-do-pal ko ruka bhi hai

sahil jaisi umar mein hum se sagar ne ek baat na ki

lahron ne to jaane kya kya kaha bhi hai aur suna bhi hai

ishq to ek ilzam hai us ka wasl ka to bas nam hua

wo aaya tha qatil ban ke qatl hi kar ke gaya bhi hai