hath malwati hain huron ko tumhaari chuDiyan

haath malvātī haiñ hūroñ ko tumhārī chūḌiyāñ

pyārī pyārī hai kalā.ī pyārī pyārī chūḌiyāñ

band kar detī haiñ sab ko pyārī pyārī chūḌiyāñ

boltī haiñ laakh meñ baḌh kar tumhārī chūḌiyāñ

ai buto sarkash agar ho ātish-e-rañg-e-hinā

sho.ala-e-javvāla ban jaa.eñ tumhārī chūḌiyāñ

barhamī halqa-bagoshoñ kī unheñ manzūr hai

phuuT Dalvātī haiñ lākhoñ meñ tumhārī chūḌiyāñ

hūroñ kī āñkhoñ ke halqe ai parī maujūd haiñ

in butānoñ se chaḌhāo pyārī pyārī chūḌiyāñ

dil meñ chhed kar ḳhuun kī būñdoñ se har reza bhare

TuuT kar ban jaa.eñ būñde kī kaTārī chūḌiyāñ

sarv-qāmat haiñ hazāroñ dām-e-ulfat meñ asiir

tauq-e-qumrī haiñ tumhārī pyārī pyārī chūḌiyāñ

sadqe hotī haiñ barābar un kalā.ī pahuñchoñ par

gird phirtī haiñ ḳhushī se baarī baarī chūḌiyāñ

dast-e-nāzuk ne zamāne ko kiyā halqa-ba-gosh

kyā khule bandoñ nazar aa.iiñ tumhārī chūḌiyāñ

ai falak un ko nahīñ bhātā sitāroñ kā bhī joḌ

kahte haiñ merī balā pahne kuñvārī chūḌiyāñ

rū-e-raushan par jo tum ne haath rakhā naaz se

chāñd kā haala nazar aa.iiñ tumhārī chūḌiyāñ

hūreñ bhejeñgī tujhe ai rashk-e-gul firdaus se

lā.egī mashshāta-e-fasl-e-bahārī chūḌiyāñ

kyuuñ na nikle nok ḳhūñ-rezī ke har andāz meñ

lauT kar bhī dil meñ chubhtī haiñ tumhārī chūḌiyāñ

bal nikālā saikḌoñ bāñkoñ kā dast-e-nāz se

baañk ke fan meñ huiiñ yaktā tumhārī chūḌiyāñ

ḳhuun kī būñdeñ banī haiñ chunniyāñ yāqūt kī

dil meñ chubh kar de rahī haiñ zaḳhm-e-kārī chūḌiyāñ

kyuuñ na hoñ halqa-ba-gosh aa kar hasīnān-e-bahisht

hūroñ ke kānoñ kī baalī haiñ tumhārī chūḌiyāñ

maiñ ne hāthā-pā.ī jab kī sard-mohre se kahā

garm-joshī se huiiñ ThanDī hamārī chūḌiyāñ

dekh lo ai gul-ruḳho murġhān-e-dil pāband haiñ

baal ke phañde kī sūrat haiñ tumhārī chūḌiyāñ

karte haiñ apne zabānoñ meñ tire hāthoñ kā vasf

boltī haiñ ek muñh ho kar sitārī chūḌiyāñ

har sitāre kī chamak nūr-e-jahān-e-husn hai

rakhtī haiñ hukm-e-jahāñgīrī tumhārī chūḌiyāñ

jaan paḌ jaatī hai dast-e-nāz se har chiiz meñ

rañg ban kar chaḌhtī haiñ hāthoñ meñ saarī chūḌiyāñ

go guhar ho ai parī nāz-e-nigāh-e-hūr kā

ainak-e-rizvāñ kī halqa haiñ tumhārī chūḌiyāñ

kar ke hāthā-pā.ī Dolī meñ kiyā un ko savār

saaf ThanDī ho ga.iiñ vaqt-e-savārī chūḌiyāñ

būñdoñ ke halqe nahīñ paḌte haiñ ai gul nahr meñ

Dāltā hai hindu-e-abr-e-bahārī chūḌiyāñ

ḳhuun lākhoñ kā kiyā karte haiñ har jhankār se

ḳhuub sachchā joḌ chaltī haiñ tumhārī chūḌiyāñ

ġhair DevḌhī par kiyā karte haiñ ārā.ish kā zikr

halqa-e-bairūn-e-dar Thahrī tumhārī chūḌiyāñ

naaz se farmāte haiñ luuñ kis tarah terā salām

haath uTh sakte nahīñ aisī haiñ bhārī chūḌiyāñ

utrī paḌtī haiñ phisal kar dast-e-nāzuk se mudām

kis tarah Thahreñ kalā.ī meñ tumhārī chūḌiyāñ

maar Daalā ātish-e-ġham ne jalā kar ai 'munīr'

ThanDī kar diiñ sog meñ us gul ne saarī chūḌiyāñ

hath malwati hain huron ko tumhaari chuDiyan

pyari pyari hai kalai pyari pyari chuDiyan

band kar deti hain sab ko pyari pyari chuDiyan

bolti hain lakh mein baDh kar tumhaari chuDiyan

ai buto sarkash agar ho aatish-e-rang-e-hina

shoala-e-jawwala ban jaen tumhaari chuDiyan

barhami halqa-bagoshon ki unhen manzur hai

phuT Dalwati hain lakhon mein tumhaari chuDiyan

huron ki aankhon ke halqe ai pari maujud hain

in butanon se chaDhao pyari pyari chuDiyan

dil mein chhed kar KHun ki bundon se har reza bhare

TuT kar ban jaen bunde ki kaTari chuDiyan

sarw-qamat hain hazaron dam-e-ulfat mein asir

tauq-e-qumri hain tumhaari pyari pyari chuDiyan

sadqe hoti hain barabar un kalai pahunchon par

gird phirti hain KHushi se bari bari chuDiyan

dast-e-nazuk ne zamane ko kiya halqa-ba-gosh

kya khule bandon nazar aain tumhaari chuDiyan

ai falak un ko nahin bhata sitaron ka bhi joD

kahte hain meri bala pahne kunwari chuDiyan

ru-e-raushan par jo tum ne hath rakha naz se

chand ka haala nazar aain tumhaari chuDiyan

huren bhejengi tujhe ai rashk-e-gul firdaus se

laegi mashshata-e-fasl-e-bahaari chuDiyan

kyun na nikle nok KHun-rezi ke har andaz mein

lauT kar bhi dil mein chubhti hain tumhaari chuDiyan

bal nikala saikDon bankon ka dast-e-naz se

bank ke fan mein huin yakta tumhaari chuDiyan

KHun ki bunden bani hain chunniyan yaqut ki

dil mein chubh kar de rahi hain zaKHm-e-kari chuDiyan

kyun na hon halqa-ba-gosh aa kar hasinan-e-bahisht

huron ke kanon ki baali hain tumhaari chuDiyan

main ne hatha-pai jab ki sard-mohre se kaha

garm-joshi se huin ThanDi hamari chuDiyan

dekh lo ai gul-ruKHo murghan-e-dil paband hain

baal ke phande ki surat hain tumhaari chuDiyan

karte hain apne zabanon mein tere hathon ka wasf

bolti hain ek munh ho kar sitari chuDiyan

har sitare ki chamak nur-e-jahan-e-husn hai

rakhti hain hukm-e-jahangiri tumhaari chuDiyan

jaan paD jati hai dast-e-naz se har chiz mein

rang ban kar chaDhti hain hathon mein sari chuDiyan

go guhar ho ai pari naz-e-nigah-e-hur ka

ainak-e-rizwan ki halqa hain tumhaari chuDiyan

kar ke hatha-pai Doli mein kiya un ko sawar

saf ThanDi ho gain waqt-e-sawari chuDiyan

bundon ke halqe nahin paDte hain ai gul nahr mein

Dalta hai hindu-e-abr-e-bahaari chuDiyan

KHun lakhon ka kiya karte hain har jhankar se

KHub sachcha joD chalti hain tumhaari chuDiyan

ghair DewDhi par kiya karte hain aaraish ka zikr

halqa-e-bairun-e-dar Thahri tumhaari chuDiyan

naz se farmate hain lun kis tarah tera salam

hath uTh sakte nahin aisi hain bhaari chuDiyan

utri paDti hain phisal kar dast-e-nazuk se mudam

kis tarah Thahren kalai mein tumhaari chuDiyan

mar Dala aatish-e-gham ne jala kar ai 'munir'

ThanDi kar din sog mein us gul ne sari chuDiyan