hath phailao to suraj bhi siyahi dega

haath phailāo to sūraj bhī siyāhī degā

kaun is daur meñ sachchoñ kī gavāhī degā

soz-e-ehsās bahut hai ise kam-tar mat jaan

yahī sho.ala tujhe bālīda-nigāhī degā

yuuñ to har shaḳhs ye kahtā hai kharā sonā huuñ

kaun kis ruup meñ hai vaqt batā hī degā

huuñ pur-ummīd ki sab āstīñ rakhte haiñ yahāñ

koī ḳhanjar to mirī pyaas bujhā hī degā

shab-gazīda ko tire is kī ḳhabar hī kab thī

din jo aa.egā ġham-e-lā-mutanāhī degā

aa.ina sāf-dil itnā bhī nahīñ ab ki tumheñ

asl chehre ke ḳhat-o-ḳhāl dikhā hī degā

tere hāthoñ kā qalam hai jo asā-e-darvesh

yahī ik din tujhe ḳhurshīd-kulāhī degā

hath phailao to suraj bhi siyahi dega

kaun is daur mein sachchon ki gawahi dega

soz-e-ehsas bahut hai ise kam-tar mat jaan

yahi shoala tujhe baalida-nigahi dega

yun to har shaKHs ye kahta hai khara sona hun

kaun kis rup mein hai waqt bata hi dega

hun pur-ummid ki sab aastin rakhte hain yahan

koi KHanjar to meri pyas bujha hi dega

shab-gazida ko tere is ki KHabar hi kab thi

din jo aaega gham-e-la-mutanahi dega

aaina saf-dil itna bhi nahin ab ki tumhein

asl chehre ke KHat-o-KHal dikha hi dega

tere hathon ka qalam hai jo asa-e-darwesh

yahi ek din tujhe KHurshid-kulahi dega