hath se haihat kya jata raha

haath se haihāt kyā jaatā rahā

marne jiine kā mazā jaatā rahā

zindagī kā aasrā jaatā rahā

haa.e jiine kā mazā jaatā rahā

le gayā sarmāya-e-sabr-o-qarār

māya-dar ab sabr kā jaatā rahā

umr bhar kī sab kamā.ī luT ga.ī

ziist kā barg-o-navā jaatā rahā

dil agar baaqī rahā kis kaam kā

chain dil kā ai ḳhudā jaatā rahā

zindagānī kī halāvat uTh ga.ī

dāna-pānī kā mazā jaatā rahā

jo sahārā thā dam-e-darmāndagī

vo buḌhāpe kā asā jaatā rahā

kījiye kis baat kī ab aarzū

aarzū kā mudda.ā jaatā rahā

gul huā apnā charāġh-e-ārzū

nuur ghar kā ai ḳhudā jaatā rahā

haa.e kaisā luT gayā bāġh-e-murād

kyā shajar phūlā-phalā jaatā rahā

roiye kyā zindagānī ko 'zahīr'

maut kā bhī ab mazā jaatā rahā

hath se haihat kya jata raha

marne jine ka maza jata raha

zindagi ka aasra jata raha

hae jine ka maza jata raha

le gaya sarmaya-e-sabr-o-qarar

maya-dar ab sabr ka jata raha

umr bhar ki sab kamai luT gai

zist ka barg-o-nawa jata raha

dil agar baqi raha kis kaam ka

chain dil ka ai KHuda jata raha

zindagani ki halawat uTh gai

dana-pani ka maza jata raha

jo sahaara tha dam-e-darmandagi

wo buDhape ka asa jata raha

kijiye kis baat ki ab aarzu

aarzu ka muddaa jata raha

gul hua apna charagh-e-arzu

nur ghar ka ai KHuda jata raha

hae kaisa luT gaya bagh-e-murad

kya shajar phula-phala jata raha

roiye kya zindagani ko 'zahir'

maut ka bhi ab maza jata raha