hathon mein gar hai jam to lab pe dua bhi hai

hāthoñ meñ gar hai jaam to lab pe du'ā bhī hai

is mai-kade meñ zāhido zikr-e-ḳhudā bhī hai

in'ām bhī hai 'ishq agarche sazā bhī hai

lazzat hai kuchh tapish meñ ḳhalish meñ maza bhī hai

rūThī hai duniyā saarī tire rūThne ke baa'd

jab tum badal ga.e ho to badlī havā bhī hai

itnī sī baat aa.ī na vā'iz samajh tujhe

terā hai jo ḳhudā vo hamārā ḳhudā bhī hai

likh likh ke kaale kar diye panne to be-shumār

ik she'r ne tire kisī dil ko chhuā bhī hai

maujūd har jagah pe hai dikhtā kahīñ nahīñ

andar bhī hai hamāre vo ham se judā bhī hai

sach-sach batā 'sadā' tū garebāñ meñ jhāñk kar

terī nigāh meñ koī tujh se burā bhī hai

hathon mein gar hai jam to lab pe du'a bhi hai

is mai-kade mein zahido zikr-e-KHuda bhi hai

in'am bhi hai 'ishq agarche saza bhi hai

lazzat hai kuchh tapish mein KHalish mein maza bhi hai

ruThi hai duniya sari tere ruThne ke ba'd

jab tum badal gae ho to badli hawa bhi hai

itni si baat aai na wa'iz samajh tujhe

tera hai jo KHuda wo hamara KHuda bhi hai

likh likh ke kale kar diye panne to be-shumar

ek she'r ne tere kisi dil ko chhua bhi hai

maujud har jagah pe hai dikhta kahin nahin

andar bhi hai hamare wo hum se juda bhi hai

sach-sach bata 'sada' tu gareban mein jhank kar

teri nigah mein koi tujh se bura bhi hai