hathon se gir gai mere miTTi ki KHair ho

hāthoñ se gir ga.ī mire miTTī kī ḳhair ho

ghar meñ hī baiThī rah ga.ī beTī kī ḳhair ho

hāthoñ ke ok meñ mire jaltā rahā charāġh

aadhī hathelī jal ga.ī aadhī kī ḳhair ho

bastī meñ bāñsurī kī sadā jab sunā.ī de

banjāre tū jiye tirī vanjlī kī ḳhair ho

maiñ ne to ek sher kahā husn-e-yār par

mahfil meñ jhūmtī huī laḌkī kī ḳhair ho

dil ke har ek saaz pe raqsāñ haiñ dhaḌkaneñ

terī bhī ḳhair ho tirī mastī kī ḳhair ho

niklī hai dasht ko vo panah kī hī aas meñ

vahshat bhare jahān meñ siskī kī ḳhair ho

ik vasl ek hijr hai dulhan kī maañg meñ

shahnā.iyoñ meñ dab chukī siskī kī ḳhair ho

is vāste na māñgī kabhī apnī ḳhair dost

maiñ chāhtā yahī thā ki bas terī ḳhair ho

paalā hai is ne maañ kī tarah apnī god meñ

terī bhī ḳhair ho mirī miTTī kī ḳhair ho

dam dam hamārī aañkh se Tapke sharāb-e-ishq

āñkhoñ ne dī duā mire saaqī kī ḳhair ho

'abdul' nasīb ho use phūloñ kā ik jahāñ

hāthoñ se uḌne vaalī bhī titlī kī ḳhair ho

hathon se gir gai mere miTTi ki KHair ho

ghar mein hi baiThi rah gai beTi ki KHair ho

hathon ke ok mein mere jalta raha charagh

aadhi hatheli jal gai aadhi ki KHair ho

basti mein bansuri ki sada jab sunai de

banjare tu jiye teri wanjli ki KHair ho

main ne to ek sher kaha husn-e-yar par

mahfil mein jhumti hui laDki ki KHair ho

dil ke har ek saz pe raqsan hain dhaDkanen

teri bhi KHair ho teri masti ki KHair ho

nikli hai dasht ko wo panah ki hi aas mein

wahshat bhare jahan mein siski ki KHair ho

ek wasl ek hijr hai dulhan ki mang mein

shahnaiyon mein dab chuki siski ki KHair ho

is waste na mangi kabhi apni KHair dost

main chahta yahi tha ki bas teri KHair ho

pala hai is ne man ki tarah apni god mein

teri bhi KHair ho meri miTTi ki KHair ho

dam dam hamari aankh se Tapke sharab-e-ishq

aankhon ne di dua mere saqi ki KHair ho

'abdul' nasib ho use phulon ka ek jahan

hathon se uDne wali bhi titli ki KHair ho