حبس تعلقات میں دور نہ جا ادھر ادھر

حبس تعلقات میں دور نہ جا ادھر ادھر

غیر ہوا نہیں کہ بس چوم لیا ادھر ادھر

دیکھ رہی ہے کشت دل اشکوں کی بے وفائیاں

اب کے برس برس گئی ساری گھٹا ادھر ادھر

جان مری شکست سے شور ترا ہے ہر طرف

ساتھ مرے بکھر گئی میری نوا ادھر ادھر

دل کو مرے ترا یہ شوق تجھ سے بھی تھا عزیز تر

تیری گلی کے آس پاس میں جو رہا ادھر ادھر

دیکھیے کب کہاں کوئی کیسے اسے اچھال دے

سکۂ وقت پر ہیں نقش شاہ و گدا ادھر ادھر

راہ میں رک کے کس لئے پوچھیں کسی سے راستہ

خواب کا یہ سفر ہے اور خواب میں کیا ادھر ادھر

ہوش جو تھا سو ایک عمر مجھ کو کہیں نہ لے گیا

کم تو نہیں کہ لے گیا اس کا نشہ ادھر ادھر