had-e-imkan KHalaon se pare mangta hai

had-e-imkān ḳhalāoñ se pare māñgtā hai

lafz vo apne ḳhayāloñ se baḌe māñgtā hai

roz hotā hai hamesha ke liye mujh se judā

roz uTh kar vo tahajjud meñ mujhe māñgtā hai

ek arsa huā is tark-e-marāsim ko magar

ab bhī vo mujh se mohabbat ke sile māñgtā hai

zindagī ishq-e-butāñ meñ hai guzārī jis ne

ab vo mandir bhī farishtoñ se bhare māñgtā hai

ek TuuTī huī kashtī kā musāfir hai magar

qulzum-e-dard kināroñ pe chaḌhe māñgtā hai

jo duāoñ ko samajhtā thā ziyāñ harfoñ kā

log lākhoñ vo janāze meñ khaḌe māñgtā hai

apne dushman se vo chhupne ke liye mujh se 'na.īm'

apne bichhḌe hue yāroñ ke pate māñgtā hai

had-e-imkan KHalaon se pare mangta hai

lafz wo apne KHayalon se baDe mangta hai

roz hota hai hamesha ke liye mujh se juda

roz uTh kar wo tahajjud mein mujhe mangta hai

ek arsa hua is tark-e-marasim ko magar

ab bhi wo mujh se mohabbat ke sile mangta hai

zindagi ishq-e-butan mein hai guzari jis ne

ab wo mandir bhi farishton se bhare mangta hai

ek TuTi hui kashti ka musafir hai magar

qulzum-e-dard kinaron pe chaDhe mangta hai

jo duaon ko samajhta tha ziyan harfon ka

log lakhon wo janaze mein khaDe mangta hai

apne dushman se wo chhupne ke liye mujh se 'naim'

apne bichhDe hue yaron ke pate mangta hai