hadis-e-shauq kahen ya karen hayat ki baat

hadīs-e-shauq kaheñ yā kareñ hayāt kī baat

har ek baat tirī chashm-e-iltifāt kī baat

ḳhizāñ kā zikr bhalā mausam-e-bahār meñ kyā

tulūa-e-sub.h-e-daraḳhshāñ meñ kaisī raat kī baat

hadīs-e-dard-o-alam ko agar alag kar leñ

to kis zabāñ se kareñ karb-e-kā.enāt kī baat

bahār-e-mai-kada-o-sāqī-o-sharāb-o-shabāb

koī sune to kaheñ dil ke vārdāt kī baat

ġham-e-hayāt kā darmāñ na kar sake lekin

bahut hī ġhaur se sunte rahe hayāt kī baat

rah-e-talab meñ nasheb-o-farāz-e-manzil kī

unheñ ḳhabar jo samajhte haiñ hādsāt kī baat

maiñ apne hosh bhī qaa.em na rakh sakā jab 'faiz'

vo ek raat kā qissa hai ek raat kī baat

hadis-e-shauq kahen ya karen hayat ki baat

har ek baat teri chashm-e-iltifat ki baat

KHizan ka zikr bhala mausam-e-bahaar mein kya

tulua-e-subh-e-daraKHshan mein kaisi raat ki baat

hadis-e-dard-o-alam ko agar alag kar len

to kis zaban se karen karb-e-kaenat ki baat

bahaar-e-mai-kada-o-saqi-o-sharab-o-shabab

koi sune to kahen dil ke wardat ki baat

gham-e-hayat ka darman na kar sake lekin

bahut hi ghaur se sunte rahe hayat ki baat

rah-e-talab mein nasheb-o-faraaz-e-manzil ki

unhen KHabar jo samajhte hain hadsat ki baat

main apne hosh bhi qaem na rakh saka jab 'faiz'

wo ek raat ka qissa hai ek raat ki baat