hai aaina-KHane mein tera zauq-faza raqs

hai ā.īna-ḳhāne meñ tirā zauq-fazā raqs

karte haiñ bahut se tire ham-shakl judā raqs

be-zaḳhm sadā dene lage saaz ajab kyā

gar karne lageñ ḳhud-baḳhud ālāt-e-ġhina raqs

ho gar na tirī baaġh meñ aane kī tavaqqo

kyuuñ sarv ko ta.alīm kare bād-e-sabā raqs

vaañ qāfila manzil pe bhī pahuñchā magar ab tak

ham karte haiñ sahrā meñ bā-āvāz-e-darā raqs

hai vādi-e-ġham vo ki gar aa jaa.eñ idhar ḳhizr

rāshe se kare haath meñ hazrat ke asā raqs

ma.aqūl sahī vajd kā hiila magar ai shaiḳh

achchhā nahīñ bā-īñ-hama-tamkīn-o-hayā raqs

yuuñ hī to ḳharābāt meñ aao ki sarāsar

yā baada hai yā bañg hai yā naġhma hai yā raqs

yaañ tum ko ye āvāz-e-daf-o-chañg mubārak

be-kashmakash-e-ḳhirqa-o-tasbīh-o-ridā raqs

'nāzim' tire ash.ār meñ haiñ ma.anī-e-tauhīd

is zamzame par karte haiñ mardān-e-ḳhudā raqs

hai aaina-KHane mein tera zauq-faza raqs

karte hain bahut se tere ham-shakl juda raqs

be-zaKHm sada dene lage saz ajab kya

gar karne lagen KHud-baKHud aalat-e-ghina raqs

ho gar na teri bagh mein aane ki tawaqqo

kyun sarw ko talim kare baad-e-saba raqs

wan qafila manzil pe bhi pahuncha magar ab tak

hum karte hain sahra mein ba-awaz-e-dara raqs

hai wadi-e-gham wo ki gar aa jaen idhar KHizr

rashe se kare hath mein hazrat ke asa raqs

maqul sahi wajd ka hila magar ai shaiKH

achchha nahin ba-in-hama-tamkin-o-haya raqs

yun hi to KHarabaat mein aao ki sarasar

ya baada hai ya bang hai ya naghma hai ya raqs

yan tum ko ye aawaz-e-daf-o-chang mubarak

be-kashmakash-e-KHirqa-o-tasbih-o-rida raqs

'nazim' tere ashaar mein hain mani-e-tauhid

is zamzame par karte hain mardan-e-KHuda raqs