hai aaine ke muqabil jo hu-ba-hu kya hai

hai aa.ine ke muqābil jo hū-ba-hū kyā hai

ye merā ruup nahīñ hai to jalva-rū kyā hai

mire badan kī ragoñ meñ sharāb kī sūrat

jo sar paTaktā guzartā hai jū-ba-jū kyā hai

munāfarat ke ḳhasāre meñ ḳhush-ḳhirām rahe

sarisht-e-ādam-e-ḳhākī meñ ḳhū-ba-ḳhū kyā hai

magan hai aur kisī soch meñ mirā vijdān

maiñ apne aap se maḳhfī huā huuñ tū kyā hai

hatak hai bāda-kashoñ kī baḌhā.eñ dast-e-sharāb

nazar se uTh nahīñ paa.e to phir subū kyā hai

hameñ to koī tafarruq nazar nahīñ aatā

sarāb-e-mehr-e-tamannā yā māh-rū kyā hai

tumhārā naam hai 'ashraf' suḳhan-tarāz magar

tumhīñ kaho ki ye andāz-e-guftugū kyā hai

hai aaine ke muqabil jo hu-ba-hu kya hai

ye mera rup nahin hai to jalwa-ru kya hai

mere badan ki ragon mein sharab ki surat

jo sar paTakta guzarta hai ju-ba-ju kya hai

munafarat ke KHasare mein KHush-KHiram rahe

sarisht-e-adam-e-KHaki mein KHu-ba-KHu kya hai

magan hai aur kisi soch mein mera wijdan

main apne aap se maKHfi hua hun tu kya hai

hatak hai baada-kashon ki baDhaen dast-e-sharab

nazar se uTh nahin pae to phir subu kya hai

hamein to koi tafarruq nazar nahin aata

sarab-e-mehr-e-tamanna ya mah-ru kya hai

tumhaara nam hai 'ashraf' suKHan-taraaz magar

tumhin kaho ki ye andaz-e-guftugu kya hai