hai bahut taq wo bedad mein Dar hai ye bhi

hai bahut taaq vo bedād meñ Dar hai ye bhī

jaañ salāmat na bachā lā.ūñ ḳhatar hai ye bhī

dil kī lau phir usī Thahrāo pe aa jā.egī

ik zarā der havāoñ kā asar hai ye bhī

jū-e-pāyāb-e-mohabbat meñ javāhir mat DhūñDh

kisī patthar ko samajh le ki guhar hai ye bhī

justujū gauhar-e-ma.anī kī ziyāñ vaqt kā hai

kyā parakhtā hai unheñ sarf-e-nazar hai ye bhī

manzileñ ḳhatm huiiñ tark o ta.alluq kī tamām

ab kisī samt nikal jā ki safar hai ye bhī

ab salāmat kahāñ rah pā.egā ye naqsh-e-vafā

kuchh lahū dil kā bachā le ki hunar hai ye bhī

dasht o dar meñ vahī surḳhī vahī peḌoñ pe chamak

zard phūloñ ko na dekho to sahar hai ye bhī

aage chal ke to kaḌe kos haiñ tanhā.ī ke

aur kuchh duur talak lutf-e-safar hai ye bhī

kyā hai maiñ jis ke tajassus meñ pareshān bhī huuñ

'zeb' kuchh haath na aa.egā ḳhabar hai ye bhī

hai bahut taq wo bedad mein Dar hai ye bhi

jaan salamat na bacha laun KHatar hai ye bhi

dil ki lau phir usi Thahrao pe aa jaegi

ek zara der hawaon ka asar hai ye bhi

ju-e-payab-e-mohabbat mein jawahir mat DhunDh

kisi patthar ko samajh le ki guhar hai ye bhi

justuju gauhar-e-mani ki ziyan waqt ka hai

kya parakhta hai unhen sarf-e-nazar hai ye bhi

manzilen KHatm huin tark o talluq ki tamam

ab kisi samt nikal ja ki safar hai ye bhi

ab salamat kahan rah paega ye naqsh-e-wafa

kuchh lahu dil ka bacha le ki hunar hai ye bhi

dasht o dar mein wahi surKHi wahi peDon pe chamak

zard phulon ko na dekho to sahar hai ye bhi

aage chal ke to kaDe kos hain tanhai ke

aur kuchh dur talak lutf-e-safar hai ye bhi

kya hai main jis ke tajassus mein pareshan bhi hun

'zeb' kuchh hath na aaega KHabar hai ye bhi