hai be-lab-o-zaban bhi ghul tere nam ka

hai be-lab-o-zabān bhī ġhul tere naam kā

mahram nahīñ hai gosh magar is payām kā

ḳhush hai malāmat ahl-e-ḳharābāt kai liye

is silsile meñ naam nahīñ nañg-o-nām kā

naḳhvat hai jis ke kāsa-e-sar meñ bharī hui

kab mustahiq hai mahfil rindāñ meñ jaam kā

jāgīr-e-dard par hameñ sarkār-e-ishq ne

tahrīr kar diyā hai vasīqa davām kā

vādī-e-ishq meñ na milā koī ham-safar

sunte the naam ḳhizr alaihis-salām kā

āsūdgī na DhūñD ki jaatā hai kārvāñ

le musta.ār barq se vaqfa qayām kā

kholā hai mujh pe sirr-e-haqīqat majāz ne

ye puḳhtagī sila hai ḳhayālāt-e-ḳhām kā

khātā nahīñ fareb-e-tamannā-e-do-jahāñ

ḳhūgar nahīñ hai tausan-e-himmat lagām kā

mat rakh tama.a se chashm-e-tamatto ki hai yahāñ

daana har ek mardumak-e-dīda-dām kā

pahuñchā diyā hudūd-e-do-ālam se bhī pare

mutrib ne raag chheḌ diyā kis maqām kā

zulmat meñ kyā tamīz safed-o-siyāh kī

furqat meñ kuchh hisāb nahīñ sub.h-o-shām kā

jis kī nazar hai san.at-e-abrū-nigār par

hai vo qatīl-e-teġh na kushta niyām kā

khāne ko ai harīs ġham-e-ishq kam nahīñ

ye ho to kuchh bhī fikr na kar qarz-o-vām kā

maiñ be-qarār-e-manzil-e-maqsūd be-nishāñ

raste kī intihā na Thikānā maqām kā

gar dekhiye to ḳhātir-e-nāshād shaad hai

sach pūchhiye to hai dil-e-nākām kaam kā

uTThe tirī naqāb to uTh jaa.e ek baar

sab tafraqa ye roz-o-shab-o-sub.h-o-shām kā

hai be-lab-o-zaban bhi ghul tere nam ka

mahram nahin hai gosh magar is payam ka

KHush hai malamat ahl-e-KHarabaat kai liye

is silsile mein nam nahin nang-o-nam ka

naKHwat hai jis ke kasa-e-sar mein bhari hui

kab mustahiq hai mahfil rindan mein jam ka

jagir-e-dard par hamein sarkar-e-ishq ne

tahrir kar diya hai wasiqa dawam ka

wadi-e-ishq mein na mila koi ham-safar

sunte the nam KHizr alaihis-salam ka

aasudgi na DhunD ki jata hai karwan

le mustaar barq se waqfa qayam ka

khola hai mujh pe sirr-e-haqiqat majaz ne

ye puKHtagi sila hai KHayalat-e-KHam ka

khata nahin fareb-e-tamanna-e-do-jahan

KHugar nahin hai tausan-e-himmat lagam ka

mat rakh tama se chashm-e-tamatto ki hai yahan

dana har ek mardumak-e-dida-dam ka

pahuncha diya hudud-e-do-alam se bhi pare

mutrib ne rag chheD diya kis maqam ka

zulmat mein kya tamiz safed-o-siyah ki

furqat mein kuchh hisab nahin subh-o-sham ka

jis ki nazar hai sanat-e-abru-nigar par

hai wo qatil-e-tegh na kushta niyam ka

khane ko ai haris gham-e-ishq kam nahin

ye ho to kuchh bhi fikr na kar qarz-o-wam ka

main be-qarar-e-manzil-e-maqsud be-nishan

raste ki intiha na Thikana maqam ka

gar dekhiye to KHatir-e-nashad shad hai

sach puchhiye to hai dil-e-nakaam kaam ka

uTThe teri naqab to uTh jae ek bar

sab tafraqa ye roz-o-shab-o-subh-o-sham ka