hai dil ko is tarah se mere yar ki talash

hai dil ko is tarah se mire yaar kī talāsh

jis tarah thī kalīm ko dīdār kī talāsh

hoñ riñd sar khulā bhī jo hove to Dar nahīñ

zāhid nahīñ ki mujh ko ho dastār kī talāsh

maiñ huuñ kahīñ pa āThoñ pahar hai usī kī fikr

jaatī nahīñ hai dil se mire yaar kī talāsh

dil hāthoñ-hāth bik gayā bāzār-e-ishq meñ

karnī paḌī na mujh ko ḳharīdār kī talāsh

apne hī dil meñ DhūñDhnā lāzim thā yaar ko

itne dinoñ jo kī bhī to be-kār kī talāsh

bai.āna naqd-e-jāñ karo 'sayyāh' pesh-kash

rahtī hai un ko aaise ḳharīdār kī talāsh

hai dil ko is tarah se mere yar ki talash

jis tarah thi kalim ko didar ki talash

hon rind sar khula bhi jo howe to Dar nahin

zahid nahin ki mujh ko ho dastar ki talash

main hun kahin pa aaThon pahar hai usi ki fikr

jati nahin hai dil se mere yar ki talash

dil hathon-hath bik gaya bazar-e-ishq mein

karni paDi na mujh ko KHaridar ki talash

apne hi dil mein DhunDhna lazim tha yar ko

itne dinon jo ki bhi to be-kar ki talash

baiana naqd-e-jaan karo 'sayyah' pesh-kash

rahti hai un ko aaise KHaridar ki talash