hai jaan-e-hazin ek lab-e-ruh-faza do

hai jān-e-hazīñ ek lab-e-rūh-fazā do

ai kaash ki is ek kī ho jaa.eñ davā do

thā ḳhār-e-jigar hijr meñ tanhā ġham-e-dūrī

haiñ āfat-e-jāñ vasl meñ ab sharm-o-hayā do

mastāna-ravish kyuuñ na chale vo nigah-e-nāz

āñkheñ haiñ ki haiñ jām-e-mai-e-hosh-rubā do

jī tañg hai kyā kījiye aur josh-e-balā ye

dil ek hai kyā dījiye aur zulf-e-dotā do

hai ain ināyat jo nishāñ pūchhiye merā

ye bhī nahīñ manzūr to apnā hī patā do

kyā dām-e-fareb us ne bichhāyā hai dil-āvez

do aan phañseñ aur jo ho jaa.eñ rihā do

gar nāz-ḳhud-ārā ko hai yaktā.ī kā da.avā

kyuuñ ā.īna dekhā ki hue jalva-numā do

bebākī-o-shoḳhī bhī hai aur sharm-o-hayā bhī

do mahram-e-asrār haiñ to parda-kushā do

do gesū-o-do zulf-e-balā-ḳhez haiñ chāroñ

haañ kākul-e-ḳhamdār bhī haiñ un ke sivā do

vo tarz-o-ravish haa.e vo andāz-o-adā haif

kyā bachte dil-o-jān kujā chaar kujā do

serī-e-nazar bhī na huī haa.e mayassar

āñkheñ jo huiiñ chaar lage tīr-e-qazā do

hai jaan-e-hazin ek lab-e-ruh-faza do

ai kash ki is ek ki ho jaen dawa do

tha KHar-e-jigar hijr mein tanha gham-e-duri

hain aafat-e-jaan wasl mein ab sharm-o-haya do

mastana-rawish kyun na chale wo nigah-e-naz

aankhen hain ki hain jam-e-mai-e-hosh-ruba do

ji tang hai kya kijiye aur josh-e-bala ye

dil ek hai kya dijiye aur zulf-e-dota do

hai ain inayat jo nishan puchhiye mera

ye bhi nahin manzur to apna hi pata do

kya dam-e-fareb us ne bichhaya hai dil-awez

do aan phansen aur jo ho jaen riha do

gar naz-KHud-ara ko hai yaktai ka dawa

kyun aaina dekha ki hue jalwa-numa do

bebaki-o-shoKHi bhi hai aur sharm-o-haya bhi

do mahram-e-asrar hain to parda-kusha do

do gesu-o-do zulf-e-bala-KHez hain chaaron

han kakul-e-KHamdar bhi hain un ke siwa do

wo tarz-o-rawish hae wo andaz-o-ada haif

kya bachte dil-o-jaan kuja chaar kuja do

seri-e-nazar bhi na hui hae mayassar

aankhen jo huin chaar lage tir-e-qaza do